پاکستان مسلم لیگ ن کے رہنما عطا تارڑ نے کہا ہے کہ الیکشن موخر ہوئے تو احتجاج کے لیے چیئرمین پی ٹی آئی کے ساتھ بھی کھڑے ہو سکتے ہیں۔
پاکستان مسلم لیگ ن کے مرکزی رہنما اور سابق وزیراعظم کے مشیر عطا تارڑ نے اے آر وائی نیوز کو انٹرویو میں الیکشن موخر ہونے کی صورت میں چیئرمین پی ٹی آئی کے ساتھ مل کر احتجاج کرنے کا عندیہ دے دیا ہے۔
عطا تارڑ نے اس مختصر انٹرویو میں یقین ظاہر کیا کہ الیکشن آئندہ سال فروری تک ہو جائیں گے جب ان سے سوال کیا گیا کہ اگر انتخابات مذکورہ مدت سے بھی آگے بڑھے تو ن لیگ کیا کرے گی جس پر انہوں نے کہا کہ انتخابات موخر ہوئے تو مسلم لیگ ن اور پیپلز پارٹی ایک ٹرک پر ہوں گی۔
جب ن لیگی رہنما سے اس ممکنہ احتجاج میں چیئرمین تحریک انصاف کی شمولیت سے متعلق پوچھا گیا تو وہ بولے کہ احتجاجی تحریک میں چیئرمین پی ٹی آئی بھی ہمارے ساتھ ہو سکتے ہیں۔