لاہور: مسلم لیگ ن نے پنجاب میں الیکشن کی تیاری شروع کردی اور فعال کردار ادا نہ کرنیوالے ممبران اسمبلی کو ٹکٹ نہ دینے کا فیصلہ کرلیا۔
تفصیلات کے مطابق مسلم لیگ ن نے پنجاب میں پارلیمانی بورڈ بنانے پر کام شروع کر دیا ، پارلیمانی بورڈ پنجاب میں الیکشن کیلئے امیدواروں کے انٹرویو اور ٹکٹ کا فیصلہ کرے گا۔
مریم نواز ،خواجہ آصف، حمزہ شہباز، رانا ثنا اور خرم دستگیر پارلیمانی بورڈ کا حصہ ہوں گے جبکہ ن لیگ کے ڈویژنل صدور کو بھی پارلیمانی کمیٹی کا حصہ بنانے پر غور کیا جارہا ہے۔
پارلیمانی بورڈ امیداروں کے انٹرویو کے بعد حتمی رپورٹ وزیراعظم کو بھیجے گا ، شہباز شریف نواز شریف سے مشاورت کے بعد ٹکٹ کی تقسیم کا حتمی فیصلہ کریں گے۔
ذرائع کے مطابق امیدواروں کو ٹکٹس میاں شہباز شریف کے دستخط سے جاری ہوں گے ، چیف آرگنائزر مریم نواز آئندہ ہفتے پاکستان آکر پارلیمانی بورڈ اور انتخابی مہم کا حصہ بنیں گی۔
ذرائع کا کہنا ہے کہ ن لیگ نے فعال کردار ادا نہ کرنیوالے ممبران اسمبلی کو ٹکٹ نہ دینے کا فیصلہ کیا ہے۔
