The news is by your side.

Advertisement

ٹوبہ ٹیک سنگھ میں بھی کراچی سے اچھی بسیں ہیں، شہباز شریف

سندھ کو پنجاب اور کراچی کو لاہور جیسا بنا دیں گے، خالی دعوے کرنے نہیں آیا

کراچی: مسلم لیگ ن کے صدر شہباز شریف نے کراچی سے اپنے انتخابی مہم کا آغاز کر دیا ہے، انھوں نے کہا کہ یہاں نہ سڑکیں ہیں نہ بسیں، ٹوبہ ٹیک سنگھ میں بھی کراچی سے اچھی بسیں ہیں۔

ان خیالات کا اظہار انھوں نے کراچی میں پریس کانفرنس کرتے ہوئے کیا، ان کا کہنا تھا کہ پارٹی میں یہ فیصلہ کیا گیا تھا کہ انتخابی مہم کا آغاز شہرِ قائد سے کیا جائے گا۔

سابق وزیر اعلیٰ پنجاب نے  لیاری کا بھی دورہ کیا۔ انھوں نے کہا کہ کراچی میں تاجروں سے ان کی ملاقاتیں ہوئی ہیں، انھوں نے ن لیگ پر بھرپور اعتماد کا اظہار کیا۔ ہم سندھ کو پنجاب اور کراچی کو لاہور جیسا بنا دیں گے۔

شہباز شریف نے اعلان کیا کہ این اے 244 سے مفتاح اسماعیل ہمارے امیدوار ہوں گے، جب کہ سلمان خان این اے 247 سے مسلم لیگ (ن) کی نمائندگی کریں گے۔ اگر ووٹ دیا گیا تو کراچی سے چھ ماہ میں کچرا ختم کردیں گے، ایک نہیں پانچ میٹرو بنائیں گے۔

ان کا کہنا تھا کہ کراچی میں بھتہ خوری اور ٹارگٹ کلنگ اب نہ ہونے کے برابر رہ گئی ہے، اب کراچی میں صاف پانی اور روزگار کی فراہمی اور کچرا صاف کرنے کا وقت ہے۔ خیال رہے کہ پنجاب میں صاف پانی اسکینڈل ن لیگ کے گلے کا پھندا بنا ہوا ہے۔

شہباز شریف نے کہا کہ کراچی آپریشن ہماری حکومت کا فیصلہ تھا جس کے نتیجے میں امن لوٹ آیا، رینجرز اہل کاروں نے اس امن کے لیے قربانیاں دیں، ہماری ان وفاقی خدمات کا موازنہ صوبائی سطح سے کر کے دیکھیں، فرق معلوم ہوجائے گا۔

کسی سے پوچھے بغیر کراچی آپریشن شروع کیا، چوہدری نثار


خیال رہے کہ چند روز قبل سابق وزیر داخلہ چوہدری نثار علی خان نے دعویٰ کیا تھا کہ کراچی میں رینجرز آپریشن ان کے حکم پر شروع ہوا، اور اس کے لیے انھوں نے کسی سے نہیں پوچھا تھا۔

سابق وزیر اعلیٰ پنجاب نے کہا کہ کراچی میں ٹرانسپورٹ نہ ہونے کے برابر ہے، اگر عوام نے ووٹ دیا تو کراچی کو لاہور سے بھی بہتر بنا دیں گے، اور سندھ کو پنجاب جیسا بنائیں گے۔


خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

Comments

comments

یہ بھی پڑھیں