اسلام آباد : قائد حزب اختلاف شہبازشریف کی زیرصدارت مسلم لیگ (ن) کی مرکزی مجلس عاملہ کے اجلاس میں مولانا فضل الرحمن کے اکتوبر میں اعلان کردہ آزادی مارچ میں شرکت کا فیصلہ کرلیا گیا۔
تفصیلات کے مطابق پاکستان مسلم لیگ (ن) کی مرکزی مجلس عاملہ کا اجلاس ہوا، جس کی صدارت شہباز شریف نے کی ، اجلاس میں راجہ ظفرالحق ، پرویز رشید، احسن اقبال، ایاز صادق، مریم اورنگزیب،مشاہد اللہ ،حنیف عباسی،جاوید لطیف ، آصف کرمانی ،امیر مقام ،خرم دستگیر،رانامشہود اور دیگر رہنما شریک ہوئے۔
اجلاس میں ملکی مجموعی سیاسی، معاشی، سفارتی صورتحال سمیت اہم قومی امور پرغور کیا گیا اور مقبوضہ کشمیر کی صورت حال، حکومتی اقدامات اور مستقبل کی حکمت عملی کا جائزہ لیا گیا۔
مرکزی مجلس عاملہ کے اجلاس میں مولانا فضل الرحمن کے اکتوبر میں اعلان کردہ آزادی مارچ میں شرکت کا فیصلہ کیا گیا اور کہا گیا کہ مارچ میں عملی شرکت کیلئے جے یو آئی ف سے مشاورت کریں۔
اجلاس میں نواز شریف سمیت دیگر اسیر رہنماؤں کی رہائی کیلئے مہم شروع کرنے کا بھی فیصلہ کیا گیا۔
یاد رہے 26 ستمبر کو شہباز شریف نے سابق وزیراعظم نواز شریف سے کوٹ لکھپت جیل میں ملاقات کی تھی اور 30 ستمبر کی کل جماعتی کانفرنس کے ایجنڈے پرنوازشریف سے ہدایات لیں تھیں۔
اے آر وائی نیوز کی ڈیجیٹل ڈیسک کی جانب سے شائع کی گئی خبریں