لاہور : مسلم لیگ ق کے وفد نے آصف زرداری کو چوہدری شجاعت ،پرویزالٰہی کا پیغام پہنچایا اور پرویز الٰہی کی حمایت کی درخواست کردی۔
تفصیلات کے مطابق پنجاب کی وزارت اعلیٰ کے لئے ق لیگ نے ایک بار پھر آصف زرداری سے رابطہ کیا ، ذرائع نے کہا کہ طارق بشیر چیمہ اور سالک حسین کی آصف زرداری سے ملاقات ہوئی۔
ملاقات میں طارق بشیر نے آصف زرداری کو چوہدری شجاعت ،پرویزالٰہی کا پیغام بھی پہنچایا اور پرویز الٰہی کی حمایت کی درخواست کردی۔
ذرائع کے مطابق آصف زرداری نے ق لیگی رہنماؤں کی بات مسکراکرٹال دی اور مثبت جواب نہ دیا۔
ذرائع نے بتایا کہ لیگی رہنماؤں نے پیپلزپارٹی ارکان پنجاب اسمبلی سے انفرادی رابطے بھی کئے، جس میں پی پی ارکان نے فیصلے کو آصف زرداری کی منظوری سے مشروط کردیا۔
ق لیگ وفد آصف زرداری کو عدم اعتماد کی کامیابی کی مبارکباد دے کر رخصت ہوا۔
دوسری جانب پیپلز پارٹی کے پارلیمانی لیڈر پنجاب اسمبلی حسن مرتضیٰ نے کہا کہ پی پی پنجاب کی پارلیمانی پارٹی کاق لیگ سےکوئی رابطہ نہیں ہوا اور رابطوں کو آصف زرداری کی منظوری سے مشروط نہیں کیا گیا۔
حسن مرتضیٰ کا کہنا تھا کہ فیصلے پارٹی قیادت کرتی ہے ،کارکن نہیں، سیاست میں ساکھ کی اہمیت ہوتی ہےفیصلے روزانہ تبدیل نہیں ہوتے، اصولی سیاست کی وجہ سے پیپلز پارٹی کو کافی تکالیف برداشت کرنا پڑیں۔
