مسلم لیگ ق کے رہنما اور سابق وفاقی وزیر مونس الہٰی نے کہا ہے کہ حمزہ شہباز ایسی مرغی ہے جو سارے انڈوں پر خود بیٹھنا چاہتی ہے۔
اے آر وائی نیوز کے مطابق مسلم لیگ ق کے مرکزی رہنما اور سابق وفاقی وزیر مونس الہٰی نے وزیراعلیٰ پنجاب حمزہ شہباز کی پریس کانفرنس پر سماجی رابطوں کی ویب سائٹ ٹوئٹر پر ٹوئٹ اور اپنے ایک بیان میں ردعمل دیتے ہوئے کہا ہے کہ حمزہ شہباز خود پنجاب کابینہ نہیں چاہتے وہ ایسی مرغی ہیں جو خود سارے انڈوں پر بیٹھنا چاہتی ہے۔
مونس الہٰی نے کہا کہ یہ پنجاب ہے حمزہ شہباز کا پولٹری فارم نہیں کہ وہ تمام اختیارات اپنے ہاتھ میں رکھنا چاہتے ہیں، حمزہ ہوا میں انگلی لہراتے ہیں لیکن صرف انگلی لہرانے سے حکومت نہیں چلا کرتی۔
حمزہ شہباز پنجاب میں کابینہ خود نہیں چاہتے۔ وہ تمام اختیارات اپنے ہاتھ میں رکھنا چاہتے ہیں ۔ حمزہ شہباز ایسی مرغی ہیں جو سارے انڈوں پر خود بیٹھنا چاہتی ہے مگر یہ پنجاب ہے ان کا پولٹری فارم نہیں۔
#امپورٹڈ__حکومت___نامنظور pic.twitter.com/E1f2LEKVyP— Moonis Elahi (@MoonisElahi6) May 19, 2022
انہوں نے مزید کہا کہ اگر حمزہ سنجیدہ ہوتے تو کابینہ کو کسی سے بھی حلف دلوا دیتے لیکن وہ تمام اختیارات اپنے ہاتھ میں رکھنا چاہتے ہیں لیکن ہم پنجاب میں ون مین شو نہیں چلنے دیں گے۔
مونس الہٰی نے کہا کہ سپریم کورٹ فیصلے کے بعد حمزہ شہباز کا وزیر اعلیٰ کے منصب پر رہنا بلاجواز اور غیر قانونی ہے اور اب وہ ایک سیکنڈ بھی اس کرسی پر نہیں بیٹھ سکتے۔
واضح رہے کہ وزیراعلیٰ پنجاب حمزہ شہباز نے پریس کانفرنس میں سابق حکومت کو کڑی تنقید کا نشانہ بنایا تھا۔
حمزہ شہباز نے کہا تھا کہ عمران نیازی نے 4 سال ملکی معیشت کے ساتھ کھلواڑ کیا وہ ایک روز کہتا تھا کہ قوم کو خوشخبری سناؤں گا اور اگلے روز مہنگائی بڑھ جاتی تھی، یہ آئی ایم ایف کی شرائط بھی پوری کررہا تھا اور سبسڈی بھی دے رہا تھا۔
ان کا کہنا تھا کہ نوازشریف،شہبازشریف نےسکھایا اللہ کی مخلوق کی خدمت کرو، حق پر بات کرتا ہوں جھوٹی سچی رام کہانیاں نہیں سناتا، میرے پاس جادو کی چھڑی نہیں اور نہ کوئی جادو ٹونا کیا ہے۔
