The news is by your side.

Advertisement

ًمسلم لیگ ن کے رکن اسمبلی نے نوازشریف کو ’بھگوڑا‘ قرار دے دیا

گوجرانوالہ: مسلم لیگ ن کے رکن صوبائی اسمبلی چوہدری اشرف علی نے نوازشریف کو بھگوڑا قرار دے دیا۔

گوجرانوالہ میں اپنی رہائش گاہ پر منعقدہ تقریب سے خطاب کرتے ہوئے رکن اسمبلی کا کہنا تھا کہ ’نوازشریف نظریاتی ہیں اور نہ ہی انقلابی بلکہ وہ بھگوڑے ہیں‘۔

اُن کا کہنا تھا کہ ’نوازشریف کو قومی اداروں کی تضحیک اور قومی سلامتی کے راز افشا نہیں کرنے چاہیے تھے۔ انہوں نے بطور وزیراعظم جو حلف اٹھایا اُس کی خلاف ورزی کی‘۔

چوہدری اشرف علی کا کہنا تھا کہ ’پاکستانی عوام مودی اور جندال کا کھیل کھیلنے والوں کے ساتھ نہیں اور نہ ہی اُن کے ساتھ کبھی کھڑے ہوں گے‘۔

یاد رہے کہ نوازشریف کی قومی اداروں کے خلاف تقریر اور اہم رازوں پر لب کشائی کرنے کے بعد مسلم لیگ ن میں بغاوت پیدا ہوگئی ہے، متعدد اراکین اسمبلی نے نوازشریف کی تقاریر کی نہ صرف مذمت کی بلکہ اُن کا ساتھ نہ دینے کا عندیہ بھی دیا۔

مزید پڑھیں: مسلم لیگ ن نوازشریف سے اختلاف کرنے والے ارکان اسمبلی کو شوکاز نوٹس دے کر پھنس گئی

یہ بھی پڑھیں: اراکین اسمبلی اب مسلم لیگ ن کے ساتھ چلنے کو تیار نہیں، جلیل شرقپوری

اس معاملے پر سب سے پہلے رکن صوبائی اسمبلی جلیل شرقپوری نے آواز بلند کی اور اعلان کیا تھا کہ وہ ایسی کسی بھی تحریک کا حصہ نہیں بن سکتے جو ملک کے خلاف ہو۔

وفاقی وزیر برائے سائنس اینڈ ٹیکنالوجی فواد چوہدری نے اب سے کچھ دیر قبل دعویٰ کیا کہ ’مسلم لیگ ن کے 70 فیصد اراکین اور کارکنان نے نوازشریف اور مریم کے بیانیے کو مسترد کردیا ہے‘۔

واضح رہے کہ نوازشریف کی تقریر کی مخالفت کرنے والے اراکین اسمبلی اور رہنماؤں کو مسلم لیگ ن کی قیادت نے شوکاز نوٹس جاری کیے ہیں، جن اراکین کو نوٹس جاری کیے گئے اُن کی گزشتہ دنوں وزیراعلیٰ پنجاب سردار عثمان بزدار سے ملاقات ہوئی تھی۔

Comments

یہ بھی پڑھیں