کراچی: مسلم لیگ ن کے رہنما محمد زبیر کا کہنا ہے کہ سارے اہم عہدے پیپلزپارٹی رکھے گی اور ذمہ داری نہیں لے گی۔
اے آر وائی نیوز سے خصوصی گفتگو کرتے ہوئے ن لیگی رہنما محمد زبیر نے کہا کہ ن لیگ کے پاس پیپلزپارٹی کی شرائط ماننے کے سوا کوئی چارہ نہیں ہے، ن لیگ پیپلزپارٹی کو کابینہ میں شامل کرنے کی کوشش کرے گی۔
انہوں نے کہا کہ حکومت سازی کے لیے پی پی کے تعاون کے بغیر سادہ اکثریت حاصل نہیں ہوسکتی۔
محمد زبیر نے کہا کہ پیپلزپارٹی صرف لیڈر آف دی ہاؤس منتخب کرنے کے لیے ووٹ دے گی، پی ٹی آئی والے اپوزیشن میں بیٹھ کر کردار ادا کریں گے۔
ن لیگی رہنما نے کہا کہ پی ٹی آئی ورکرز میں مرکز کے لیے جوش و خروش ہے جبکہ ن لیگ ورکرز میں ایسا نہیں ہے، کیا 16 ماہ والی حکومت جیسی دوبارہ صورتحال ہوگی، میری نظر میں ن لیگ کے لیے بڑی مشکلات ہیں۔
انہوں نے کہا کہ پیپلزپارٹی نے تو سارا بوجھ ن لیگ پر ڈال دیا ہے خود ایک طرف ہوگئی ہے۔
محمد زبیر نے کہا کہ شہباز شریف کی باڈی لینگویج سے لگ رہا تھا وہ پراعتماد نہیں تھے، ان کی پریس کانفرنس کے وقت تو پی پی کے فیصلے بھی نہیں آئے تھے۔
ایک سوال کے جواب میں انہوں نے کہا کہ اس مرتبہ آئی ایم ایف پروگرام بھی سخت ہوگا، مشکل فیصلے کرنا ہوں گے، ساری ذمہ داری مسلم لیگ ن پر آئے گی۔
محمد زبیر نے کہا کہ ن لیگ کو چاہیے کہ پیپلزپارٹی کو کابینہ میں شامل کرے، ن لیگ کی حکومت جب بھی اقتدار میں آتی ہے اسٹاک مارکیٹ مثبت جاتی ہے، اس مرتبہ اسٹاک مارکیٹ پر بھی ویسے ہی مثبت اثرات نظر نہیں آئے۔
انہوں نے مزید کہا کہ پہلے سے نظر آرہا ہے کہ انتہائی کمزور حکومت ہوگی، آگے بجٹ آرہا ہے اس موقع پر بھی ن لیگ کو مشکلات کا سامنا ہوگا، خارجہ پالیسی، معاشی پالیسی سمیت اہم معاملات ہیں مشکل فیصلے کرنے ہوں گے۔
