تازہ ترین

حکومت کا ججز کے خط پر انکوائری کمیشن بنانے کا اعلان

اسلام آباد: وفاقی حکومت نے اسلام آباد ہائی کورٹ...

فوجی عدالتوں سے 15 سے 20 ملزمان کے رہا ہونے کا امکان

اسلام آباد : اٹارنی جنرل نے فوجی عدالتوں سے...

عوامی عدالت نے طلال اور دانیال کے حق میں فیصلہ سنا دیا، نوازشریف

پشاور: سابق نااہل وزیراعظم اور مسلم لیگ ن کے سربراہ نوازشریف نے کہا ہے کہ طلال چوہدری اور دانیال عزیز پر توہین عدالت کا الزام لگا کر طلب کرلیا گیا مگر عوامی عدالت نے میری نااہلی سمیت تمام نوٹسس کا فیصلہ سنا دیا، انتخابات میں مسلم لیگ ن کو ووٹ دیں تاکہ پارلیمنٹ کو مضبوط کر کے عدالتی فیصلہ ختم کرسکیں۔

پشاور میں مسلم لیگ ن کے جلسہ عام سے خطاب کرتے ہوئے نوازشریف کا کہنا تھا کہ اس بات پر نااہل قرار دےدیا گیا کہ بیٹے سے تنخواہ نہیں لی، یہ کھیل گزشتہ 70 سالوں سے جاری ہے، طلال چوہدری اور دانیال عزیز پر توہین عدالت لگا کر انہیں طلب کرلیا گیا، جو لوگ یہ فیصلے کررہے ہیں وہ سوچیں کہ انہیں اللہ کی عدالت میں بھی جاکر جواب دینا ہے۔

اُن کا کہناتھا کہ ’مجھے ہمیشہ کے لیے نااہل قرار دے دیا گیا۔ کیا آپ کو یہ فیصلہ منظور ہے؟ کیا اس طرح کے فیصلے  سے آپ کا اور میرا تعلق ختم ہوسکتا ہے؟‘، آئندہ انتخابات میں مسلم لیگ ن کو ووٹ دیں تاکہ پارلیمنٹ میں قوانین بناکر عدالتی فیصلے کو ختم کیا جائے۔

سابق نااہل وزیر اعظم نے عمران خان پر شدید تنقید کرتے ہوئے سوالات کیے کہ ’کہاں ہیں وہ درخت، ڈیم، اسپتال، اسکولز جن کا وعدہ کیا تھا، پشاور کے عوام اچھی طرح سے لوگوں کا چہرہ پہنچان چکے اس لیے اب کہتا ہوں کہ مسلم لیگ ن آرہی ہے اور لاڈلے کی چھٹی ہونے والی ہے‘۔

نوازشریف نے سوات میں دہشت گردی کےنتیجے میں شہید ہونے والے فوجی اہلکاروں کو قوم کا ہیرو قرار دیتے ہوئے کہا کہ ’ان لوگوں کی قربانیاں رائیگاں نہیں جائیں گی، میں شہداء کو خراج تحسین پیش کرتا ہوں‘۔

خیبرپختونخواہ کی پولیس نااہل نہیں عمران خان نااہل ہیں، مریم نواز

مریم نواز نے تقریر کے آغاز پر سوات میں ہونے والی دہشت گردی کی مذمت کی اور فوجی جوانوں کی شہادت پر افسوس کا اظہار کرتے ہوئے انہیں سلام تحسین پیش کیا۔

اُن کاکہنا تھا کہ آج ہر طرف مسلم لیگ(ن) کا سیلاب آیا ہوا ہے، تاریخ گواہ ہے کہ خیبرپختونخواہ کے عوام جرات مند اور بہادر ہیں اسی طرح آپ کا لیڈر بھی بہادر ہونا چاہیے ناکہ 5 سال سازشیں کرنے والا آپ کا لیڈر ہو۔

مریم نواز کا کہنا تھا کہ پشاور کے لوگوں نے 2013 میں عمران خان کو ووٹ دیے مگر انہوں نے عوام کی خدمت نہیں کی اور کنٹینر پر چڑھ کر حکومت کے خلاف سازشیں کرتے رہے، خیبرپختونخواہ میں یکساں تعلیمی نظام بنانے اور بہترین اسپتال بنانے کا وعدہ کیا مگر ایسا کچھ نظر نہیں آیا بلکہ یہاں کے لوگ پنجاب کے اسپتالوں میں علاج کروانے آرہے ہیں۔

مسلم لیگ ن کی رہنما نے سوال کیا کہ عمران خان نے اپنے صوبے میں کوئی کام نہیں کیا اور اب چار سال گزر جانے کے بعد انہیں ہوش آیا تو نوازشریف ملک سے لوڈ شیڈنگ کا خاتمہ کرچکے، عوام کو میٹرو بس کا تحفہ دے چکے ہیں۔

اُن کا کہنا تھا کہ عمران خان جہاں جاتے ہیں پنجاب پولیس کی برائی کرتے نظر آتے ہیں مگر ہم کے پی کے کی پولیس کو اپنا سمجھتے ہیں اس لیے یہ بات کہنے میں کوئی عار نہیں کہ یہاں کی پولیس نااہل نہیں بلکہ عمران خان خود نااہل ہے۔

مریم نواز کا کہنا تھا کہ خیبرپختونخواہ پوچھ رہا ہے کہ پاکستانی کی بیٹی عاصمہ ، اسماں اور شریفہ بی بی کے قاتل کہاں ہیں؟ عمران خان کو اتنی بھی زحمت نہ ہوئی کہ انہوں نے متاثرین سے ملاقات کی ہو۔

انہوں نے پنڈال میں موجود لوگوں سے وعدہ لیا کہ وہ 2018 میں اپنے ووٹ کی توہین کا بدلہ لیتے ہوئے مسلم لیگ ن کو ہی ووٹ ڈالیں گے اور نوازشریف کو انصاف دلوائیں گے، مریم نواز کا مزید کہنا تھا کہ 2018 میں آپ کی محبت کا جواب الیکشن کے بعد خدمت کر کے دیں گے۔


اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔

Comments

- Advertisement -