The news is by your side.

اربوں روپے سے خریدے بحری جہاز میں بڑی خرابی نکل آئی

کراچی: پاکستان نیشنل شپنگ کارپوریشن کے اربوں روپے سے خریدے بحری جہاز میں بڑی خرابی نکل آئی ہے۔

تفصیلات کے مطابق پی این ایس سی نے 8 ارب روپے لاگت سے 2 بحری جہازوں کی خریداری کی تھی، ان میں سے ایک جہاز میں بڑا فالٹ نکل آیا۔

ذرائع کے مطابق پی این ایس سی کے گزشتہ ماہ اربوں روپے مالیت سے خریدے گئے ایک جہاز کا تیل پمپنگ سسٹم بوسیدہ نکلا ہے، سرگودھا جہاز شیڈول کے مطابق پیر کی شام پورٹ قاسم پر خام تیل ترسیل میں ناکام رہا۔

کارپوریشن کے ذرائع کا کہنا ہے کہ پورٹ قاسم کے آؤٹر چینل پر سمندر میں جہاز کی تین دن تک مرمت کی گئی، یہ پہلی مرتبہ ہے کہ خریداری کے فوراً بعد اس میں فالٹ نکلا ہے۔

پی این ایس سی کے ترجمان کا کہنا ہے کہ مرمت کے بعد یہ بحری جہاز آؤٹر اینکریج سے پورٹ قاسم کے لیے روانہ ہو گیا ہے، جب کہ دوسرے جہاز مردان کی اگلے ماہ ڈرائی ڈاکنگ کا فیصلہ کیا گیا ہے۔

ذرائع کا کہنا ہے کہ بیرون ملک ڈرائی ڈاکنگ یا بنیادی سروسنگ پر کروڑوں روپے خرچ ہوتے ہیں، کئی سال پہلے خریدے گئے دو جہاز خیرپور اور بولان اب تک ڈرائی ڈاک پر نہیں گئے۔

Comments

یہ بھی پڑھیں