نئی وہلی: بھارت میں شاعر اور صحافی نے مودی کو آئینہ دکھایا تو سرکار برا مان گئی، پولیس نے گرفتار کرلیا۔
بھارتی میڈیا کی رپورٹ کے مطابق سراج بسرالی نامی بھارتی شاعر نے شہریت کے متنازع قانون کے خلاف نظم پڑھی جس پر انہیں گرفتار کرلیا گیا۔ یہ واقعہ بھارتی ریاست کرناتکا میں پیش آیا۔
رپورٹ میں کہا گیا ہے کہ سراج بسرالی کے علاوہ اس صحافی کو بھی گرفتار کیا گیا ہے جس نے مذکورہ نظم کو سماجی رابطے کی ویب سائٹ فیس بک پر شیئر کی تھی۔ گرفتار دوسرے شخص کی شناخت راجا باسی کے نام سے ہوئی ہے۔
پولیس کا کہنا ہے کہ شاعر نے بڑی تقریب کے دوران شہریت کے قانون کے خلاف نظم پڑھی تھی جبکہ ان کی نظم کو راجا باسی نامی صحافی نے سوشل میڈیا پر بھی شیئر کی تھی۔
خیال رہے کہ بھارت کے مختلف شہروں میں شہریت کے متنازع قانون کے خلاف مظاہروں کا سلسلہ تاحال جاری ہے، روز بروز مظاہروں میں تیزی آرہی ہے، اب تک پولیس کی فائرنگ اور تشدد سے درجنوں مظاہرین ہلاک ہوچکے ہیں۔
واضح رہے کہ شہریت کے متنازع قانون کے خلاف ناصرف مسلمان بلکہ تمام مذاہب کے ماننے والے بھی سراپا احتجاج ہیں۔
