کراچی: شہر قائد اور پنجاب کے شہر لاہور میں لاک ڈاؤن اور ڈبل سواری کی خلاف ورزی پر کارروائیاں جاری ہیں۔
اے آر وائی نیوز کے مطابق کراچی میں ڈبل سواری پر پابندی کی خلاف ورزی کرنے والے عناصر کے خلاف کریک ڈاؤن میں 124 افراد کو گرفتار کر لیا گیا۔
ایڈیشنل آئی جی کراچی غلام نبی میمن نے بتایا کہ ڈبل سواری پابندی کی خلاف ورزی پر سینٹرل کے 2 پولیس اہل کاروں اور ساؤتھ کے ایک اہل کار پر بھی چالان کیا گیا ہے، مختلف ڈسٹرکٹس میں 57 مقدمات درج کیے گئے۔
کراچی ڈبل سواری پر پابندی، محافظوں نے قانون کو پیروں تلے روند دیا، شہریوں کے چالان
ایڈیشنل آئی جی کے مطابق یہ کارروائیاں ایسٹ، ویسٹ اور ساؤتھ زون میں کی گئیں، کارروائیوں کے دوران 3 ہزار 284 موٹر سائیکلیں ضبط کی گئیں، 3 ہزار 205 شہریوں کو وارننگ دے کر چھوڑا گیا۔
لاہور میں بھی شہریوں کو گھروں تک محدود رکھنے کے لیے پولیس کے اقدامات جاری ہیں، ڈی آئی جی آپریشنز بابر سعید کا کہنا تھا کہ 28 دن میں 2057 مقدمات درج کیے جا چکے ہیں، ایک لاکھ 75 ہزار 712 شہریوں کو روکا گیا اور ان سے باہر نکلنے کی وجہ دریافت کی گئی، ایک لاکھ 65 ہزار 227 شہریوں کو وارننگ دے کر واپس بھیجا گیا۔
ڈی آئی جی کا کہنا تھا کہ ایک لاکھ 54 ہزار 256 گاڑیوں کو چیک کیا گیا، جن میں سے 6524 گاڑیوں اور موٹر سائیکلوں کو خلاف ورزی پر بند کیا گیا، 4263 افراد سے دوبارہ غیر ضروری نہ نکلنے کے ضمانتی مچلکے لیے گئے۔
