برلن: جرمن پولیس نے دہشت گردی کی منصوبہ بندی کرنے والے 3 افراد کو حراست میں لے لیا۔
غیرملکی خبررساں ادارے کے مطابق جرمنی کے صوبے شلیسوگ ہولشنائن میں جرمن پولیس نے دہشت گردی کا منصوبہ ناکام بناتے ہوئے تین افراد کو حراست میں لے لیا، گرفتار تینوں افراد عراقی باشندے ہیں اور حملے کی منصوبہ بندی کررہے تھے۔
جرمن پولیس کے مطابق عراقی باشندوں کو خفیہ اطلاعات پر کارروائی کے دوران گرفتار کیا گیا ہے، گرفتار تینوں افراد سے مزید تفتیش جاری ہے۔
رپورٹ کے مطابق ملزمان سال نو کی تقریبات کو نشانہ بنانا چاہتے تھے ناکامی کے بعد کسی دوسرے مقام پر حملے کی منصوبہ بندی کررہے تھے۔
پولیس کا کہنا ہے کہ ملزمان کے قبضے سے اسلحہ اور بارود برآمد ہوا ہے۔
جرمن وزیر داخلہ زیہوفر نے عراقی باشندوں کی گرفتاری کی تصدیق کرتے ہوئے کہا کہ پولیس نے دہشت گردی کا بڑا منصوبہ ناکام بنایا ہے۔
مزید پڑھیں: جرمنی: دہشت گردی کی سازش میں ملوث داعش کی سہولت کار خاتون گرفتار
جرمن وزیر داخلہ نے کہا کہ ابھی تک یہ واضح نہیں ہوسکا ہے کہ گرفتار افراد کا تعلق کس دہشت گرد تنظیم ہے تاہم ملزمان سے بھاری مقدار میں اسلحہ و گولہ بارود برآمد ہوا ہے۔
انہوں نے کہا کہ گرفتار ملزمان بم بنانے کی کوشش کررہے تھے، ان کو دہشت گردانہ حملے کی منصوبہ بندی سے قبل حراست میں لے لیا گیا۔
واضح رہے کہ گزشتہ سال دسمبر میں جرمنی میں دہشت گردی کی سازش میں ملوث داعش کی سہولت کار خاتون کو گرفتار کیا گیا تھا، خاتون نے داعش کے دو ارکان کی مدد کی تھی، یہ دونوں ارکان جرمنی میں ایک حملے کی منصوبہ بندی کررہے تھے۔
