لاہور : پولیس نے 9 مئی واقعے میں ملوث مزید 6 دہشت گردوں کو گرفتار کرلیا، جس میں سے 2 دہشت گرد کور کمانڈر ہاؤس اور 4 عسکری ٹاور حملے میں ملوث تھے۔
تفصیلات کے مطابق 9 مئی واقعے میں ملوث دہشت گردوں کی گرفتاری کے حوالے سے اہم پیش رفت سامنے آئی۔
سی سی پی او لاہوربلال کمیانہ نے بتایا کہ گزشتہ رات فرار کی کوشش کرنیوالے مزید 6 دہشت گردوں کو گرفتار کرلیا ہے، جس میں سے 2 دہشت گرد کور کمانڈر ہاؤس اور 4عسکری ٹاورحملے میں ملوث تھے۔
سی سی پی او لاہور کا کہنا تھا کہ دہشت گردی کیخلاف زیرہ ٹالرنس کی پالیسی پرسختی سے عمل پیرا ہیں، دہشت گردوں کےساتھ آہنی ہاتھوں سے نمٹا جائے گا۔
دوسری جانب ترجمان پولیس نے بتایا ہے کہ زمان پارک سےپکڑے جانے والے افرادکی تعداد 14 ہوگئی، گرفتارافراد کافی دنوں سے زمان پارک میں موجود تھے۔
یاد رہے پولیس نے دعویٰ کیا تھا کہ زمان پارک سے فرار ہونے کی کوشش کرنے والے 8 دہشت گردوں کو گرفتار کرلیا ہے۔
نگراں وزیراطلاعات پنجاب عامرمیر نے بتایا تھا کہ پنجاب حکومت کی ڈیڈلائن ختم ہوئی تو الٹی میٹم کی وجہ سے دہشت گردوں نے فرار ہونے کی کوشش کی، جس میں آٹھ دہشت گردوں کو گرفتارکیا۔
عامرمیر کا کہنا تھا کہ گرفتار دہشت گرد کورکمانڈر ہاؤس پر حملے میں ملوث ہیں اور ان دہشت گردوں کی شناخت پہلے ہی کی جا چکی تھی۔
