کراچی: تین سال سے پولیس کےلئے چھلاوہ بنے میاں بیوی آخر کار گرفتار ہو گئے، ڈسٹرکٹ سینٹرل اجمیر نگری پولیس نے خفیہ اطلاع پر کارروائی کر کے ملزمان کو پکڑا۔
اے آر وائی نیوز کے مطابق کراچی کے ضلع وسطی میں چھلاوہ بنے میاں بیوی اسلحہ سمیت گرفتار کر لیے گئے، ملزمان 3 سال سے اسٹریٹ کرائم وارداتوں میں ملوث تھے،اور پولیس کے لیے چھلاوہ بنے ہوئے تھے۔
ایس ایس پی عارف اسلم راؤ نے اے آر وائی نیوز کو بتایا کہ ملزم مختار برقع پوش بیوی نادیہ کے ہمراہ وارداتیں کرتا تھا، برقع پوش بیوی کے ساتھ ہونے کی وجہ سے پولیس شک نہیں کرتی تھی، واردات کے دوران ملزم پستول نکال کر سامان چھینتا، اور بیوی بیگ میں ڈال دیتی تھی۔
پولیس کے مطابق 12سال پہلے بھی ملزم پولیس کے ہاتھوں گرفتار ہو چکا ہے، گرفتار ملزمان سے مسروقہ سونا و دیگر سامان برآمد کیا جائے گا۔
اے آر وائی نیوز کو ایک واردات کی سی سی ٹی وی فوٹیج بھی مل گئی ہے، جس میں ملزمان کو ایک خاتون سے واردات کرتے دیکھا جا سکتا ہے۔ فوٹیج کے مطابق ملزم نے خاتون سے سونے کی تمام چیزیں اتر والی تھیں۔ واردات کے وقت راہ گیر خاتون اپنے بچوں کے ساتھ گلی سے گزر رہی تھی، جب ملزمان میاں بیوی نے اسے دھر لیا۔