کراچی: شہر قائد میں اسٹریٹ کرمنلز بے لگام ہوگئے اور انہوں نے 48 گھنٹوں میں دو پولیس اہلکاروں کو شہید کردیا۔
نمائندہ اے آر وائی نیوز سلمان لودھی کے مطابق نیو کراچی کی حدود میں واقع انڈسٹریل ایریا میں پولیس مقابلے کے دوران ایک اہلکار اب سے کچھ دیر قبل شہید ہوا۔
شہید اہلکار کی شناخت عرفان کے نام سے ہوئی، جو انڈسٹریل ایریا کراچی میں تعینات تھا، نامعلوم ملزمان سے مقابلے کے دوران عرفان گولی لگنے سے زخمی ہوا جسے عباسی شہید اسپتال منتقل کیا گیا۔
ڈاکٹرز نے پولیس اہلکار کو بچانے کی کوشش کی مگر وہ جانبر نہ ہوسکا۔ ایک روز قبل بلدیہ ٹاؤن کے علاقے اتحاد ٹاؤن میں بھی اسٹریٹ کرمنلز کی فائرنگ سے پولیس اہلکار شہید ہوا تھا۔
مزید پڑھیں: کراچی، بلدیہ اتحاد ٹاؤن میں پولیس مقابلہ، اہلکار شہید، ڈاکو ہلاک
اڑتالیس گھنٹوں کے دوران دو اہلکاروں کی شہادت کے بعد پولیس حکام نے متعلقہ تھانوں کو گشت بڑھانے اور اسٹریٹ کرمنلز کے خلاف سخت کریک ڈاؤن کرنے کے احکامات جاری کردیے۔
یاد رہے کہ کراچی کے علاقے بلدیہ اتحاد ٹاؤن میں گزشتہ روز گشت پر مامور پولیس اہلکار ڈاکوؤں سے مقابلے کے دوران شہید ہوا تھا جبکہ جوابی کارروائی میں ایک ڈاکو بھی مارا گیا تھا۔ ایس ایس پی ویسٹ کا کہنا تھا کہ ڈاکوؤں نے فائرنگ کی اہلکار گشت پر تھے، ملزمان سے اسلحہ برآمد کیا گیا۔
