کراچی : گلشن معمار میں حساس اداروں اور سی ٹی ڈی کی مشترکہ کارروائی میں فائرنگ کے تبادلے کے نتیجے میں مارے گئے دو دہشت گردوں کی شناخت ہوگئی۔
اس حوالے سے پولیس ذرائع کا کہنا ہے کہ فائرنگ سے ہلاک ہونے والے مبینہ دہشت گردوں کے نام ایمل شاہ اور عبداللہ ہیں، مبینہ دہشت گردوں کے3ساتھی بھی گزشتہ سال ہلاک ہوئے تھے۔
ذرائع نے بتایا ہے کہ مبینہ دہشت گردوں کا گروپ کوئٹہ میں مختلف سنگین وارداتوں میں ملوث رہا ہے، ہلاک مبینہ دہشت گردوں کا تعلق پشین اور کوئٹہ سے تھا،
ذرائع کا مزید کہنا ہے کہ مبینہ دہشت گرد اپنے ایک ساتھی کی گرفتاری کے بعد افغانستان فرار ہوگئے تھے، ہلاک دہشت گردوں میں سریناہوٹل خودکش دھماکے کا ماسٹر مائنڈ شامل ہے۔
علاوہ ازیں پولیس ذرائع کا کہنا ہے کہ کارروائی کے دوران گرفتار ہونے والے ملزمان میں سلطان، رضوان، نعیم، جبار اور ہمدان سلفی شامل ہیں۔
واضح رہے کہ آج صبح کراچی کے علاقے گلشن معمار کے قریب جنجال گوٹھ میں واقع گھر میں دہشت گردوں کی موجودگی کی اطلاع پر حساس اداروں اور سی ٹی ڈی نے چھاپہ مارا۔
کارروائیکے دوران دہشت گردوں نے پولیس پارٹی پر فائرنگ کردی، فائرنگ کے تبادلے میں دو دہشت گرد ہلاک ہوئے جن کا تعلق کالعدم تنظیم سے ہے جب کہ سی ٹی ڈی کے 4 اہلکار بھی زخمی ہوئے۔
مزید پڑھیں : کراچی میں حساس اداروں کی مشترکہ کارروائی، 2 دہشت گرد ہلاک
سی ٹی ڈی حکام کے مطابق دہشت گردوں سے مقابلے کے وقت گھر میں ایک خاتون اور بچی بھی موجود تھی، تاہم انہیں کوئی نقصان نہیں پہنچا اور سیکیورٹی اداروں نے دونوں کو تحویل میں لے لیا۔
ڈی آئی جی آصف اعجاز شیخ کے مطابق مقابلے میں زخمی 4 سی ٹی ڈی اہلکاروں کو اسپتال منتقل کردیا گیا ہے جہاں دو کی حالت تشویشناک ہے۔
