واشنگٹن: امریکی ریاست فلوریڈا میں شاپنگ مال میں ہونے والی فائرنگ کے نتیجے میں ایک شہری زخمی ہوگیا۔
تفصیلات کے مطابق فلوریڈا کے شہر بوکارٹن میں مقامی شاپنگ مال میں ہونے والی فائرنگ کے باعث ایک شخص زخمی ہوگیا تاہم حالت خطرے سے باہر ہے۔
غیر ملکی خبر رساں ادارے کے مطابق زخمی شخص کو اسپتال میں طبی امداد فراہم کی جارہی ہے، جبکہ بوکارٹن پولیس نے شہریوں کو ٹویٹ کے ذریعے ہدایت جاری کی ہے کہ وہ مال کے اطراف کسی بھی مشکوک سرگرمیوں سے فوری طور پر پولیس کو آگاہ کریں۔
پولیس کا کہنا ہے کہ واقعے کی تحقیقات کررہے ہیں، جبکہ حملہ آور کی تلاش کے لیے بھی چھاپے مارے جارہے ہیں، ممکن ہے جلد گرفتاری عمل میں آئے۔
خیال رہے کہ امریکی کی مختلف ریاستوں میں فائرنگ کے واقعات میں اضافہ ریکارڈ کیا گیا ہے، گذشتہ روز امریکی ریاست نیویارک کے نجی سوشل کلب میں فائرنگ کے نتیجے میں 4 افراد ہلاک ہوئے تھے۔
نیویارک، بروکلین کے نجی سوشل کلب میں فائرنگ، 4 افراد ہلاک
واضح رہے کہ 6 اکتوبر کو امریکی ریاست کنساس کے بار میں فائرنگ کے نتیجے میں 4 افراد ہلاک اور 5 زخمی ہوگئے تھے۔
یاد رہے کہ گزشتہ ماہ امریکی ریاست ٹیکساس میں فائرنگ کے واقعے میں 7 افراد ہلاک اور سترہ ماہ کی بچی سمیت 22 افراد زخمی ہوگئے تھے۔
