منچن آباد: ضلع بہاولنگر کے شہر منچن آباد میں پہلے بوری بند اندھے قتل کا معما حل ہو گیا۔
تفصیلات کے مطابق پولیس نے منچن آباد میں ایک خاتون کے اندھے قتل کے ملزم ارشاد کو گرفتار کر لیا، ملزم نے خاتون غلام صدیقہ کو زیادتی کے بعد قتل کر دیا تھا، بعد ازاں اس کی لاش کو بوری میں بند کر کے پھینک دیا تھا۔
رپورٹس کے مطابق گزشتہ ماہ 3 دسمبر کو منچن آباد میں چک گامے والے قبرستان سے ایک بوری بند لاش برآمد ہوئی تھی، جس کے بارے میں معلوم ہوا کہ وہ غلام صدیقہ زوجہ محمد شریف عمر کی ہے۔ 44 سالہ غلام صدیقہ گھروں میں کام کرتی تھی، ملزم نے اس کے ساتھ زیادتی کرنے کے بعد اسے قتل کر دیا تھا۔
قبرستان سے بوری بند لاش برآمد ہونے کے بعد علاقے میں سخت خوف و ہراس پھیل گیا تھا، ڈسٹرکٹ پولیس آفیسر بہاولنگر مرزا قدوس بیگ کی ہدایت پر پولیس نے اس اندھے قتل کے ملزم ارشاد کو گزشتہ روز ٹریس کر لیا۔
منچن آباد: 9 سال کی بچی کو اغوا اور زیادتی کا نشانہ بنانے والا بھکاری گرفتار
علاقے کے ایس ایچ او کا کہنا تھا کہ ملزم نے قتل کا اعتراف کر لیا ہے، ملزم نے گھروں میں کام کرنے والی خاتون کو زیادتی کے بعد شناخت کر لیے جانے کے خوف سے اسے قتل کیا اور لاش ایک بوری میں ڈال کر قبرستان کے قریب گڑھے میں پھینک دی تھی۔
