The news is by your side.

Advertisement

ڈاکو پولیس اہلکار گرفتار، رشوت خور تفتیشی افسر نوکری سے برطرف

کراچی : ڈکیتی اور رہزنی میں ملوث پولیس اہلکار پکڑا گیا ، فیروز آباد تھانے کے رشوت خور تفتیشی افسر کو ویڈیو منظر عام آنے پر نوکری سے برطرف کردیا گیا۔

تفصیلات کے مطابق اینٹی وہیکل لفٹنگ سیل کراچی (اے وی ایل سی) کی ٹیم نے اسٹیل ٹاؤن میں کارروائی کرکے ایک پولیس اہلکار کو گرفتار کیا ہے۔

اس حوالے سے ایس ایس پی اے وی ایل سی نے میڈیا کو بتایا کہ گرفتار اہلکار درجنوں موٹرسائیکلوں کی چوری میں ملوث ہے، ملزم ڈسٹرکٹ ٹھٹھہ میں تعینات تھا، گرفتار پولیس اہلکار کے قبضے سے چوری کی موٹر سائیکل اور ایک گاڑی بھی ملی ہے۔

دوسری جانب کراچی کے علاقے فیروز آباد تھانے کے تفتیشی افسر کی رشوت لینے کی وڈیو منظر عام پر آگئی، مذکورہ پولیس افسر نے شہری کو جھوٹے مقدمے میں پھنسانے کی دھمکیاں دے کر رشوت لی۔

متاثرہ شہری کا کہنا ہے کہ انسپکٹر غلام شبیر نے ایس ایس پی کے نام پر ڈرا کر مجھ سے لاکھوں روپے بٹور لیے، بعد ازاں ویڈیو منظر عام پر آنے پر پولیس اہلکار نوکری سے برطرفی کا نوٹیفکیشن جاری کردیا گیا۔

علاوہ ازیں کراچی میں ڈاکوؤں کی دیدہ دلیری بڑھتی جارہی ہے، شہر کی مرکزی شاہراہوں پر کھلے عام وارداتیں معمول بن گئیں،
سائٹ ایریا میں ڈکیتی کی واردات کی ویڈیو اےآر وائی نیوز کو موصول ہوگئی ہے، ویڈیو میں ڈاکوؤں کے چہرے واضح دیکھے جاسکتے ہیں۔

ڈاکوؤں نے کورونا ایس او پیز کا فائدہ اٹھاتے ہوئے فیس ماسک کا استعمال بھی کیا، ڈاکوؤں نے شہری کو تشدد کو نشانہ بنایا اور موبائل فون اور رقم سے محروم کرکے باآسانی فرار ہوگئے۔

Comments

یہ بھی پڑھیں