طبی ماہرین کا کہنا ہے کہ انار کا جوس گردوں اور دل کی بیماری کیلئے انتہائی مفید ہے۔
آپ نے سپر فوڈ کے بارے میں سنا ہوگا لیکن کیا آپ جانتے ہیں کہ سپر فوڈ کسے کہتے ہیں اور کونسے پھل سپرفوڈ کے درجے پر پورا اترتے ہیں۔ غذائی ماہرین سپر فوڈ کے طور پر جن پھلوں کو منتخب کرتے ہیں وہ اینٹی آکسیڈنٹ، فائبر، وٹامنز، معدنیات اور دیگرغذائیت سے بھرے ہوتے ہیں ان میں ہماری صحت مندی، لمبی عمر اور بیماریوں سے محفوظ رکھنے کی خصوصیات شامل ہوتی ہیں۔
انار کو پھلوں میں ہمیشہ خاص اہمیت حاصل رہی ہے انار چونکہ انتہائی صحت بخش اور بیشمار امراض کے علاج میں استعمال ہوتا ہے یہی وجہ ہے کہ انار کو سْپر فروٹ کے نام سے جانا جاتا ہے۔
تاہم حالیہ تحقیق میں ماہرین طب نے اس کا ایک نیا فائدہ دریافت کیا ہے کہ باقاعدگی سے انار کا جوس پیا جائے تو اس سے گردے اور دل کے امراض سے بچا جا سکتا ہے۔
طبی ماہرین کے مطابق اگر کسی شخص کو گردے میں تکلیف ہو تو اس کو چاہیئے کہ وہ باقاعدگی سے انار کا جوس استعمال کرے اس سے ڈائیلسز کی پیچیدگیوں سے بچا جا سکتا ہے۔
علاوہ ازیں اس سے موت کا سبب بننے والے انفیکشنز اور دل کے امراض سے بھی محفوظ رہا جا سکتا ہے۔
انار قلبی نظام کو بھی طاقت فراہم کرتا ہے اور صحت مند بلڈ پریشر کی سطح کو فروغ دیتا ہے، دل کی شریانوں کو چربی سے پاک کر کے خون کے بہاو کو بہتر بناتا ہے کیونکہ شریانوں کی سختی دل کے دورے کا ایک بڑا سبب ہے۔
ماہرین کا کہنا ہے کہ روزانہ اگر نصف گلاس انار کا رس پیا جائے اور ساتھ 3 کھجوریں کھائی جائیں تو اس سے اینٹی آکسیڈنٹس کی خاطرخواہ مقدار حاصل ہوتی ہے جو اسٹروک، فالج اور امراضِ قلب سے بڑی حد تک بچاتی ہے۔
ماہرین کے مطابق اس خوراک سے خون کی نالیوں میں کولیسٹرول صاف کرنے میں بھی مدد ملتی ہے۔
