واشنگٹن: ترجمان امریکی محکمہ خارجہ ہیدر نوئرٹ نے کہا ہے کہ امریکی وزیر خارجہ مائیک پومپیو شمالی کوریا سے متعلق 27 ستمبر کو اقوام متحدہ کی سلامتی کونسل سے خطاب کریں گے۔
تفصیلات کے مطابق اپنے بیان میں ہیدرنوئرٹ کا کہنا تھا کہ مائیک پومپیو 27 ستمبر کو شمالی کوریا کے حوالے سے سلامتی کونسل کے اجلاس کی صدارت بھی کریں گے۔
ترجمان کا کہنا تھا کہ اجلاس میں وہ عالمی برادری سے مطالبہ کریں گے کہ پیونگ یانگ پر دباؤ جاری رکھا جائے تا کہ شمالی کوریا کو اُس کے جوہری ہتھیاروں سے دست برداری پر مجبور کیا جاسکے۔
واضح رہے کہ امریکی صدر ڈونلڈ ٹرمپ اور شمالی کوریا کے سربراہ کم جونگ ان کی ملاقات کے بعد دونوں ممالک کے درمیان قربتیں دیکھی گئی تھیں۔
شمالی ،جنوبی کوریا کا جوہری ہتھیاروں کے خاتمے کے لائحہ عمل پراتفاق
دوسری جانب جنوبی کوریا کے صدر مون جائے کی شمالی کوریا کے رہنما کم جونگ ان سے ملاقات میں دونوں رہنماؤں نے جوہری ہتھیاروں کے خاتمےکے لائحہ عمل پر اتفاق ہوگیا ہے۔
خیال رہے کہ گذشتہ روز شمالی کوریا کے دارالحکومت پیانگ یانگ میں مون جے ان اور کم جونگ ان کے درمیان ہونے والی ملاقات میں دونوں رہنماؤں نے خطے کی سیکیورٹی صورتحال سمیت دیگر امور پر تبادلہ خیال بھی کیا۔
یاد رہے کہ حالیہ عرصے میں ان دونوں رہنماؤں کی یہ تیسری ملاقات ہے۔
اس سے قبل جنوبی کوریائی صدر مون جے ان کے خصوصی مندوب نے شمالی کوریا کے سربراہ کم جونگ ان سے ملاقات کی تھی اور انہیں جنوبی کوریا کے صدر کا خصوصی خط بھی پیش کیا تھا۔
