فلوریڈا: امریکی ریاست فلوریڈا میں ایک انجن والا طیارہ گر کر تباہ ہونے کے نتیجے میں معمر جوڑا ہلاک ہوگیا۔
بین الاقوامی میڈیا رپورٹس کے مطابق ایک انجن والا چھوٹا طیارہ بارٹو ایگزیکٹو ایئرپورٹ پر لینڈنگ اپروچ بنا رہا تھا کہ اس دوران ہچکولے کھاتا ہوا قریبی آبادی میں جا گرا۔
پولک کاؤنٹی شیرف آفس کا کہنا ہے کہ طیارہ ایک گھر کے کھلے مقام پر گرا، جس جگہ طیارہ گرا وہاں زمین میں گڑھا پڑ گیا اور تمام رہائشی محفوظ رہے۔
پولیس کا کہنا ہے کہ تباہ حال طیارے سے ایندھن نکل رہا تھا اور خوش قسمتی سے آگ نہیں لگی، حادثے میں ہلاک ہونے والوں کی شناخت 73 بونی پاول 76 سالہ ڈینس پاول کے نام سے ہوئی ہے۔
حکام کا کہنا ہے کہ طیارے میں سوار افراد کی موقع پر ہی موت ہو چکی تھی، ریسکیو ٹیمیں جب جائے حادثہ پر پہنچی تو دونوں سوار موت کے منہ میں جاچکے تھے اور ان کی لاشوں کو اسپتال منتقل کردیا گیا ہے۔