اسلام آباد : صدر پاکستان ڈاکٹر عارف علوی نے اسلام آباد کی رہائشی خاتون کے مکان پر قبضے کا فوری نوٹس لیتے متاثرہ کا مکان واپس دلانے کے احکامات جاری کردیے۔
تفصیلات کے مطابق صدر مملکت ڈاکٹر عارف علوی کی جانب سے اسلام آباد کی خاتون کو ان کے مکان کی ملکیت واپس دلانے کا حکم جاری کیا گیا ہے۔
صدر پاکستان نے وفاقی محتسب انسداد ہراسیت کے قبضہ چھڑانے کے احکامات کو برقرار رکھتے ہوئے خواتین کے ملکیتی حقوق کے تحت مقامی کمشنر کے ذریعے خاتون کی جائیداد بحالی کا حکم صادر کیا۔
ڈاکٹر عارف علوی نے کہا کہ جائیداد پر غیرقانونی قبضہ ختم کرایا جائے اور اگر ضرورت پڑے تو تالے بھی توڑ دیئے جائیں، ملکیت واپس لینے کی راہ میں رکاوٹوں کو دور کرکے حقدارکو جائیداد دلائی جائے۔
صدر مملکت نے اپنے فیصلے میں کہا کہ مقامی کمشنر ضرورت پڑنے پر مقامی پولیس کی مدد لے سکتا ہے، انہوں نے اپنے فیصلے میں ملزم کے بےبنیاد مؤقف کو مسترد کردیا۔
