لندن: کورونا وائرس کے پیش نظر برطانوی حکومت نے منصوبہ بندی مکمل کرتے ہوئے وبا سے نمٹنے کیلیے فوج طلب کرنے کا عندیہ دے دیا۔
تفصیلات کے مطابق برطانیہ میں تیزی سے پھیلتے کورونا وائرس کے پیش نظر کوبرا کمیٹی میٹنگ میں اہم فیصلے کیے گئے ہیں۔
برطانوی وزارت دفاع نے سول اداروں کی مدد کامنصوبہ بنا لیا اور اس ضمن میں فوج کو طلب کرنے کی تجویز بھی زیر غور ہے جب کہ محکمہ صحت کے ریٹائرڈ اسٹاف کو بھی طلب کیا جا سکتا ہے.
یہ بھی پڑھیں: برطانیہ میں کرونا وائرس پنجے گاڑھنا شروع، ایمرجنسی نافذ ہونے کا امکان
برطانوی حکومت نے طے کیا ہے کہ بڑی عوامی تقریبات منسوخ کی جائیں گی اور ضرورت پڑنےپراسکول بند کر دئیے جائیں گے۔
ضرورت پڑنے پر محکمہ صحت نان ایمرجنسی علاج روک دے گا اور محکمہ صحت کو اضافی فنڈنگ فراہم کی جائے گی جب کہ غیر ضروری سفر پربھی پابندی عائد کی جائے گی۔
واضح رہے کہ دنیا بھر میں پھیلنے والا ہلاکت خیز کورونا وائرس برطانیہ سمیت 60 ممالک تک پہنچ چکا ہے، بربرطانیہ میں کورونا کے 39 مریض سامنے آ چکے ہیں جن کا علاج جاری ہے۔
