بوم بوم سے مشہور جارحانہ بلے باز شاہد خان آفریدی پاکستان کرکٹ کے لیے پاور ہٹنگ کوچ سے متعلق بول پڑے۔
پاکستان کرکٹ بورڈ (پی سی بی) نے گزشتہ ہفتے مردوں کی ٹیم کے کوچنگ اسٹاف کے لیے ایک اشتہار شائع کیا تھا۔ بورڈ نے دو نئی پوزیشنیں ہائی پرفارمنس اور پاور ہٹنگ کوچ متعارف کرائیں۔
پی سی بی کی جانب سے یہ اقدام جارحانہ کرکٹ کے تقاضوں کو مدنظر رکھتے ہوئے مستقبل کے چیلنجز کو پورا کرنا ہے۔
آفریدی نے کراچی میں میڈیا سے گفتگو کرتے ہوئے کہا کہ کرکٹ بورڈ کی جانب سے اس حوالے سے کسی نے ان سے رابطہ نہیں کیا۔
کرکٹ ویب سائٹ کے مطابق شاہد آفریدی کا کہنا ہے کہ پاور ہٹنگ کوچ سے متعلق فی الحال ان سے کسی قسم کا کوئی رابطہ نہیں ہوا تاہم کوئی رابطہ ہوا تو وہ اس متعلق ضرور آگاہ کریں گے۔
شاہد آفریدی پاکستان سپر لیگ (پی ایس ایل) سیزن سیون میں کوئٹہ گلیڈی ایٹرز کی نمائندگی کریں گے۔ انہوں نے کہا کہ وہ گلیڈی ایٹرز کے کپتان سرفراز احمد کو پرسکون کرنے کی کوشش کریں گے جو اس وقت تناؤ میں اکثر جارحانہ ہو جاتے ہیں۔
آفریدی نے کہا کہ میں ان کی حوصلہ افزائی کرنے کی کوشش کروں گا وہ میدان کے دوران جذباتی ہو جاتے ہیں ان کا ساتھ دینے کی کوشش کروں گا۔
