لاہور: سابق صدر آصف زرداری کی گرفتاری کے پیش نظر پیپلزپارٹی نے لاہور میں احتجاجی مظاہرے کرنے کا اعلان کردیا، احتجاجی مظاہرے لاہور کے 9 مختلف مقامات پر کئے جائیں گے۔
تفصیلات کے مطابق پیپلزپارٹی نے درخواست ضمانت مسترد ہونے پر سابق صدر آصف زرداری کی گرفتاری پر احتجاجی مظاہرے کا اعلان کردیا ہے ، لاہور کے 9 مختلف مقامات پر کئے جائیں گے اور پی پی کی جانب سےساڑھے 4بجے فیروزپور روڈ پرمیٹرو ٹریک بند کیا جائے گا۔
ضلعی سطح کے عہدیداروں کو احتجاج کے لئے تیار رہنے اور پولیس چھاپوں سے بچنے کے لئے گھروں سے باہر رہنے کی ہدایت کی گئی ہے۔
دوسری جانب پیپلزپارٹی نے 14 جون کو مال روڈ پر مسلم لیگ ن اور دیگر سیاسی پارٹیوں کے مشترکہ احتجاج میں بھرپور شرکت کا بھی فیصلہ کرتے ہوئے ملک بھر میں تمام ضلعی صدور کوبھی جاری کی گئی ہیں تاکہ آصف علی زرداری کی گرفتاری کی صورت میں ملک بھر میں کامیابی سے لاک ڈاون کیا جاسکے۔
مزید پڑھیں : آصف زرداری کوگرفتار کرنے نیب ٹیم زرداری ہاؤس میں داخل
یاد رہے جعلی بینک اکاؤنٹس کیس میں اسلام آباد ہائی کورٹ نے سابق صدر آصف زرداری اور فریال تالپور کی درخواست ضمانت مسترد کردی تھی اور گرفتار کرنے کا حکم دیا تھا۔
بعد ازاں سابق صدر آصف زرداری کی گرفتاری کے لیئے 5 افسران سمیت نیب کی ٹیم زرداری ہاؤس پہنچ گئی ہے۔
