The news is by your side.

Advertisement

سندھ ریزرو پولیس کے اہلکاروں کی برطرفی کا معاملہ حل کیا جائے، بلاول بھٹو

کراچی : پاکستان پیپلزپارٹی کے چیئرمین بلاول بھٹو زرداری نے کراچی میں سندھ ریزرو پولیس کے برطرف اہلکاروں کی جانب سے کئے گئے احتجاج کا نوٹس لیتے ہوئے حکومت سندھ سے کہا ہے کہ سپریم کورٹ کے فیصلوں کی روشنی میں کیس ٹو کیس معاملے کا حل نکالا جائے۔

بلاول ہاؤس سے جاری کردہ بیان میں بلاول بھٹو زرداری نے کہا کہ پاکستان پیپلزپارٹی نے کبھی بھی کسی سے روزگار چھیننے کی شروعات یا اس کی حمایت نہیں کی ہے ۔

انہوں نے کہا کہ میرٹ کی بنیاد پر مستحقین کو نوکریاں دینے کے پاداش میں آمروں اور ان کی باقیات نے سابق وزیراعظم بے نظیر بھٹو سمیت پارٹی کی قیادت کوعدالتوں تک پہنچایا۔

مزید پڑھیں: سندھ ریزرو پولیس کے1800اہلکاروں کی بھرتیاں جعلی قرار

بلاول بھٹو زرداری نے حکومت سندھ سے کہا ہے کہ ایک وزارتی کمیٹی بنائی جائے جو کیس ٹو کیس بنیاد پراس معاملے کا حل نکالے کیونکہ پاکستان پیپلزپارٹی کسی سے بھی تمام ضوابط اور میرٹ کی اہلیت کے بعد دی جانے والی نوکریاں چھیننے کی ذمے داری کبھی نہیں لے گی۔

چیئرمین پاکستان پیپلزپارٹی نے کہا کہ جو بھی ضوابط کی خلاف ورزی اور غیر قانونی بھرتیوں میں ملوث ہو اس کو قانونی گرفت میں لا کر سزا دینی چاہئیے لیکن جن غریب سپاہیوں نے میرٹ کے تمام تقاضے پورے کیے ہوں اور پھر جسمانی تربیت بھی حاصل کی ہو ان کو دوسروں کی سزا نہیں ملنی چاہیے۔

 

Comments

comments

یہ بھی پڑھیں