The news is by your side.

Advertisement

ن لیگ سے ہمیشہ وفا کی، بدلے میں بے وفائی ملی، زرداری کا شکوہ

کراچی: پیپلزپارٹی کے شریک چیئرمین اور سابق صدر آصف زرداری کا کہنا ہے کہ ہم نے ن لیگ سے ہمیشہ وفا کی انہوں ںے وفا نہیں کی۔

اے آر وائی نیوز کی رپورٹ کے مطابق پیپلزپارٹی سی ای سی اجلاس کی اندرونی کہانی سامنے آگئی جس میں سابق صدر آصف زرداری نے شکوہ کیا کہ ہم جب بھی ن لیگ سے ہاتھ ملاتے ہیں وہ آگے بڑھ جاتے ہیں، اگر ن لیگ پیچھے ہٹی تو ہم اپنی اے پی سی بلائیں گے۔

آصف زرداری نے کہا کہ پی پی ہمیشہ سیاسی و جمہوری قوتوں کو ساتھ لے کر چلی ہے، روایت برقرار رکھیں گے، پہلے بھی سازشوں کا ڈٹ کر مقابلہ کیا اب بھی کریں گے۔

سابق صدر نے کہا کہ عدالتوں کا احترام کرتے ہیں، میں خود پیر کے روز عدالت کے سامنے پیش ہوں گا، آمرانہ سوچ کا ہمت اور بہادری کے ساتھ ڈٹ کر مقابلہ کریں گے۔

مزید پڑھیں: توشہ خانہ کیس: آصف علی زرداری کا احتساب عدالت پیش ہونے کا فیصلہ

آصف زرداری نے کہا کہ ماضی میں بھی مقدمات بنانے والوں نے مقدمہ ثابت نہیں کیا اب بھی نہیں کرپائیں گے۔

واضح رہے کہ احتساب عدالت میں 17 اگست کو توشہ خانہ کیس میں سماعت ہوگی، سابق صدر آصف علی زرداری نے احتساب عدالت میں پیش ہونے کا فیصلہ کیا ہے۔

ذرائع کا کہنا تھا کہ آصف زرداری،فریال تالپور کل کراچی سے اسلام آباد پہنچیں گے۔پیپلزپارٹی نے آصف علی زرداری کی پیشی پر بھرپور شو آف پاور کا فیصلہ کیا ہے۔

ذرائع کا کہنا تھا کہ پی پی ارکان پارلیمان اور پیپلز لائرز فورم کے ارکان کو 17 اگست کو اسلام آباد پہنچنے کی ہدایت کی گئی ہے۔

Comments

یہ بھی پڑھیں