لاہور : پیپلزپارٹی کے رکن قومی اسمبلی عبدالقادر خان مندوخیل نے رانا ثناء اوراسحاق ڈار کی وزارتیں کسی اور اتحادی کو دینے کا مطالبہ کرتے ہوئے کہا اچھا ہے نوازشریف واپس نہ آئیں کیونکہ پیپلزپارٹی تو آگے بڑھ رہی ہے۔
تفصیلات کے مطابق پیپلزپارٹی کے رکن قومی اسمبلی عبدالقادر خان مندوخیل رانا ثنااللہ ، اسحاق ڈار اور مریم نواز پر برس پڑے۔
پیپلزپارٹی کے رکن قومی اسمبلی عبدالقادر خان مندوخیل نے اے آر وائی نیوز کو انٹرویو دیتے ہوئے کہا کہ وزارت داخلہ اور خزانہ ن لیگ سے نہیں چل رہی تو کسی اور پارٹی کو دے دیں۔
پی پی MNA قادر مندوخیل نون پر برس پڑے۔رانا ثناء , اسحاق ڈار کی وزارتیں کسی اور اتحادی کو دینے کا مطالبہ۔راناثناء نے IKکو مس ہینڈل کیا۔PTI پر پابندیوں کی بجائے سیاست میں مقابلہ کریں۔مفتاح اور ڈار کی لڑائی میں مفتاح نواز شریف کے گھر تک گیا۔لیکن نون والےخاموش کیونکہ وہ PM کا پارٹنر pic.twitter.com/nECfBZEdQQ
— Naeem Ashraf Butt (@NaeemAshrafBut2) April 1, 2023
رانا ثنا اللہ کے حوالے سے عبدالقادر خان مندوخیل کا کہنا تھا کہ تھوڑا تگڑے ہو جاؤ ایک آدمی نہیں سنبھالا جارہا، راناثنا نے عمران خان کےمعاملے کو مس ہینڈل کیا، آئی جی پنجاب کو بھی سزا ملنی چاہیے۔
مریم نواز پر بھی تنقید کرتے ہوئے انھوں نے کہا کہ مریم نواز ن لیگ کی چیف آرگنائزر، چچا وزیراعظم اور پارٹی سربراہ ہیں، پھر بھی مریم نواز کہیں کہ یہ ان کی حکومت نہیں تو عوام بیوقوف نہیں بن سکتے، مریم نوازپارٹی عہدےسےاستعفیٰ دیکرکہیں کہ ان کی حکومت نہیں۔
پیپلز پارٹی کے رہنما نے ایٹمی اثاثوں سے متعلق بیان پر اسحاق ڈار کیخلاف انکوائری کا مطالبہ کرتے ہوئے کہا سب کچھ آئی ایم ایف کےسامنےرکھ دیا پھر ڈار نے ایٹمی اثاثوں کی بات کیسے کی ، جیالےگردنیں کٹوادیں گے لیکن ایٹمی اثاثوں پر سمجھوتا نہیں ہونے دیں گے۔
عبدالقادر خان مندوخیل نے مزید کہا کہ اسحاق ڈار کو کسی نے بولا ہے تو نام بتائیں، عمران خان کی طرح سائفر نہ بنائیں، بطور وزیرخزانہ اتنی غلط گفتگو کیسے کرلیتے ہیں۔
نواز شریف کی واپسی کے سوال پر پی پی رکن قومی اسمبلی کا کہنا تھا کہ اچھا ہے نوازشریف واپس نہ آئیں کیونکہ پیپلزپارٹی تو آگے بڑھ رہی ہے، آصف زرداری تو بیماری میں بھی دورےکرکےلوگوں کومل رہے ہیں۔
انھوں نے مزید سوالات کا جواب دیتے ہوئے کہا اسحاق ڈارمفتاح کیخلاف بول رہاتھا، آج مفتاح ڈار کیخلاف بول رہاہے، مفتاح تو اسحاق ڈارکےمعاملے پر نواز شریف کے گھر تک پہنچ گیا، مفتاح سےکچھ نہیں پوچھیں گےکیونکہ وہ شہبازکافیکٹری پارٹنرہے۔
پی ٹی آئی پر پابندی کے سوال پر عبدالقادر خان مندوخیل کا کہنا تھا کہ میں تحریک انصاف پر پابندیوں کےحق میں نہیں، ان کا سیاسی مقابلہ ہونا چاہیے۔
