اسلام آباد : پیپلزپارٹی کے سینٹرل ایگزیکٹو کمیٹی اجلاس میں ارکان نے بعض معاملات پر پی پی قیادت پر کھل کر تنقید کرتے ہوئے کہا کہ پیپلزپارٹی ساتھ نہ دیتی تو شہباز شریف کبھی وزیراعظم نہ بنتے۔
تفصیلات کے مطابق اسلام آباد میں ہونے والی پیپلزپارٹی کی سی ای سی اجلاس کی اندرونی کہانی سامنے آگئی، سی ای سی ارکان نے بعض معاملات پر پی پی قیادت پر کھل کرتنقید کی۔
ارکان نے کہا کہ پیپلزپارٹی ساتھ نہ دیتی تو شہبازشریف کبھی وزیراعظم نہ بنتے، پی ڈی ایم آج بھی سڑکوں پر ہوتی، ن لیگ اور جےیو آئی رہنمااحسانات کا بدلہ تنقید کرکے دے رہے ہیں۔
آصف علی زرداری نے خورشید شاہ سے کہا شہبازشریف کو اپوزیشن لیڈر آپ نے بنایا تھا، جس پر بلاول بھٹو نے کہا شہباز شریف کو وزیراعظم آپ نے بنایا، بلاول بھٹو کے برجستہ جواب پرآصف زرداری اور ارکان مسکرا دیئے۔
سی ای سی ارکان نے مہنگائی میں ہوشربا اضافے پر بھی شدید تحفظات کا اظہار کرتے ہوئے کہا بجلی اور اشیائےضروریہ کی قیمتوں میں اضافےپر عوام کا سامنا کیسے کریں، موجودہ حالات میں الیکشن ہونے پرنتائج سب کے سامنے ہیں۔
سی ای سی نے وفاقی کابینہ سےمتعلق شدید تحفظات کا اظہار بھی کیا اور وفاقی کابینہ کا معاملہ آصف زرداری کے سپرد کردیا۔
پیپلزپارٹی کےسینٹرل ایگزیکٹو کمیٹی نے نگراں سندھ حکومت پر شدید تحفظات کا اظہار کیا کہ پیپلزپارٹی رہنماؤں کیخلاف کیسز بنارہی ہے۔
پی پی قیادت نے وفاقی کابینہ کا معاملہ متعلقہ فورم پر اٹھانے کی یقین دہانی کرائی اور ارکان کو الیکشن کمیشن پر بیان بازی سے گریز کرنے کی بھی ہدایت کی۔
