The news is by your side.

Advertisement

رہنما پیپلز پارٹی میر شبیر بجارانی بلامقابلہ رکن سندھ اسمبلی منتخب

کشمور: پاکستان پیپلز پارٹی کے رہنما میر شبیر بجارانی سندھ کے حلقہ پی ایس 6 سے بلامقابلہ رکن سندھ اسمبلی منتخب ہوگئے۔

تفصیلات کے مطابق شبیر بجارانی حال میں ہی انتقال کرنے والے پیپلز پارٹی کے رہنما میر ہزار خان بجارانی کے بیٹے ہیں جو کمشور کے حلقہ پی ایس 6 سے رکن منتخب ہوئے ہیں۔

الیکشن کمیشن آف پاکستان کی جانب سے شبیر علی بجارانی کی کامیابی کا نوٹیفکیشن جاری کردیا، خیال رہے کہ اس حلقے میں میر شبیر علی بجارانی کے مدمقابل واحد امیدوار کے کاغذات نامزدگی ریٹرننگ افسر نے مسترد کر دیے تھے۔

ترجمان الیکشن کمیشن کے مطابق اگر کسی حلقے میں صرف ایک ہی امیدوار ہو تو پھر اس کے بلا مقابلہ منتخب ہونے کا پبلک نوٹس جاری کر دیا جاتا ہے۔

واضح رہے کہ چند ماہ قبل سندھ کے وزیر برائے منصوبہ بندی و ترقی اور پیپلز پارٹی کے رہنما میر ہزار خان اور ان کی اہلیہ کی کراچی میں واقع رہائش گاہ سے لاشیں برآمد ہوئی تھیں۔

نومنتخب رکن سندھ اسمبلی میر شبیر بجارانی گذشتہ کئی مہینوں سے اپنی پارٹی سے ناراض تھے بعد ازاں انہوں نے پیپلز پارٹی کو خیرباد بھی کہہ دیا تھا، تاہم آصف علی زرداری سے حال ہی میں ہونے والی ملاقات کے بعد وہ دوبارہ پارٹی میں شامل ہوگئے۔

قبل ازیں ستائیس جون کو پی ایس چھ سے پیپلزپارٹی کے مرحوم رہنما میر ہزار خان بجارانی کے صاحبزادے میر شبیر بجارانی نے پارٹی چھوڑنے کا اعلان کرتے ہوئے آزاد حیثیت میں الیکشن لڑنے کا اعلان کیا تھا۔


خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

Comments

comments

یہ بھی پڑھیں