The news is by your side.

Advertisement

وسیم اختر تاریخ کے نااہل ترین میئر ثابت ہوئے ہیں، مرتضیٰ وہاب کا ردعمل

کراچی: مشیر اطلاعات سندھ مرتضیٰ وہاب نے کہا ہے کہ میئر نے کہیں بھی کراچی والوں کی خدمت نہیں کی ، وسیم اختر تاریخ کے نااہل ترین میئر ثابت ہوئے ہیں۔

تفصیلات کے مطابق مشیر اطلاعات سندھ مرتضیٰ وہاب نے وسیم اختر کے بیان پر ردعمل دیتے ہوئے کہا ہے کہ وزیراعظم عمران خان کہتے ہیں ٹیکس دیں میئر کراچی کہتے ٹیکس نہ دیں، کوئی عوام سے کہے ٹیکس نہ تو یہ عوام دشمنی کی بات ہے۔

مرتضیٰ وہاب نے کہا کہ میئر بھاگنے کی کوشش کررہے ہیں عوام بھاگنے نہیں دیں گے، اعلیٰ قیادت سے درخواست کرتا ہوں میئر کراچی کی بات کا نوٹس لیں، ملک سے بڑھ کر کچھ نہیں ہے میئر کیسے کہہ سکتے ہیں ٹیکس نہ دیں۔

انہوں نے کہا کہ ذاتی مفاد اور چھوٹے مقاصد کے لیے عوام کو غلط مشورے نہ دیں، وفاقی حکومت عوام کو کہتی ہے ٹیکس دیں تاکہ مسائل حل ہوں، حکومت کی اتحادی جماعت کا میئر عوام کو کہتا ہے ٹیکس نہ دیں، آپ کیسے کہہ سکتے ہیں ٹیکس نہ دو، خدارا ایسا نہ کریں۔

مزید پڑھیں: کراچی کی عوام سندھ حکومت کوٹیکس دینا بند کردیں، وسیم اختر

مشیر اطلاعات سندھ نے کہا کہ آج ہماری حکومت ہے تو کل آپ کی بھی حکومت ہوسکتی ہے، وسیم اختر کے بیان کی بطور شہری مذمت کرتا ہوں، ایسے بیانات سے نہ پہلے ملک کی خدمت ہوسکی نہ ہی آج ہوگی۔

انہوں نے کہا کہ آج میئر کراچی وسیم اختر نے صرف مگرمچھ کے آنسو بہائے ہیں، میئر کو مشینری بھی سندھ حکومت خرید کر دیتی ہے، بجائے اپنی ناکامی تسلیم کریں دوسروں پر الزامات لگاتے ہیں۔

مرتضیٰ وہاب نے کہا کہ نالوں کے لیے سندھ حکومت نے 55 کروڑ روپے دئیے، میئر نے ذاتی مقاصد کے لیے کراچی کے عوام کو لالی پاپ دئیے، میں سمجھتا ہوں میئر کے بیان کا فوری نوٹس لینا چاہئے، ہم سول نافرمانی کریں گے تو کراچی کی خدمت نہیں کرسکیں گے، میئر کراچی سے گزارش ہے کہ اپنے بیان کو واپس لیں۔

Comments

comments

یہ بھی پڑھیں