The news is by your side.

Advertisement

پی ایس 114، متحدہ شکست کے خوف سے واویلا کررہی ہے، پی پی رہنما

کراچی: پیپلزپارٹی کے رہنما اور پی ایس 114 کے امیدوار سعید غنی نے کہا ہے کہ ایم کیو ایم پاکستان حلقے میں کے ایم سی مشینری استعمال کر رہی ہے، متحدہ پاکستان کو اپنی شکست نظر آگئی جس کا وہ پہلے سے واویلا کررہی ہے۔

ایم کیو ایم کی پریس کانفرنس پر ردعمل دیتے ہوئے سعید غنی نے کہا کہ فاروق ستار بتائیں کس پولنگ اسٹیشن پر پیپلزپارٹی سرکاری مشینری استعمال کررہی ہے؟ ہم نے جو کچھ کیا وہ حلقے کے ووٹرز کے لیے کیا۔

انہوں نے کہا کہ متحدہ پاکستان خود پی ایس 114 کی انتخابی مہم کے لیے بلدیاتی مشینری استعمال کررہی ہے، ایم کیو ایم کے امیدوار کی گاڑی میں میئر کراچی بیٹھ کر انتخابی مہم چلارہے ہیں۔

سعید غنی نے کہا کہ ایم کیو ایم نے 2013 میں مرضی کے مطابق پولنگ اسٹیشنز بنوائے تھے تاہم اب سندھ حکومت اور پیپلزپارٹی حلقے میں شفاف انتخابات چاہتی ہے، ووٹنگ کا اختیار عوام کے پاس وہ میری جگہ کسی اورکوبھی ووٹ دے سکتےہیں۔

علاوہ ازیں پی پی کے رہنما وقار مہدی نے کہا کہ ایم کیو ایم پاکستان کو علم ہے کہ شفاف انتخابات میں اُن کا جیتنا مشکل ہے، اس صورتحال کو مدنظر رکھتے ہوئے مخالفین چوری اوپر سے سینہ زوری کے کام پر گامزن ہیں۔

انہوں نے کہا کہ فاروق ستار شکست کے خوف سے بوکھلاہٹ کا شکار ہیں، متحدہ نے ماضی کے انتخابات میں جس طریقے سے فتح حاصل کی اُسے پورا شہر جانتا ہے۔

یاد رہے سندھ اسمبلی کے حلقے پی ایس 114 میں 9 جولائی کو ضمنی انتخابات منعقد ہونے جارہے ہیں، انتخابات میں ایم کیو ایم پاکستان، پیپلزپارٹی، جماعت اسلامی، مسلم لیگ ن، تحریک انصاف کے امیدوار مدمقابل ہیں تاہم پیپلزپارٹی اور متحدہ کے امیدواران کے درمیان سخت مقابلہ متوقع ہے۔

Print Friendly, PDF & Email

Comments

comments

یہ بھی پڑھیں