The news is by your side.

Advertisement

صدر زرعی ترقیاتی بینک تقرری کیس: شہباز شریف بھی نامزد ملزمان میں شامل

اسلام آباد: صدر مسلم لیگ (ن) شہباز شریف کے لئے ایک اور مشکل کھڑی ہوگئی ہے، جہاں انہیں صدر زرعی ترقیاتی بینک طلعت محمود تقرری کیس میں ملزم نامزد کردیا گیا ہے۔

نیب ذرائع کے مطابق صدر زرعی ترقیاتی بینک طلعت محمود تقرری کیس میں لیگی صدرشہباز شریف، سابق وزیر خزانہ اسحاق ڈار اور ڈاکٹر وقار مسعود کےنام بطور ملزمان شامل کئے گئے ہیں، اس کے علاوہ ایڈیشنل سیکریٹری خزانہ عبدالاکبر شریف زادہ ، ممبر تنویر بٹ بھی ملزمان نامزد کیا گیا ہے۔

قومی احتساب بیورو کے ذرائع کا کہنا ہے کہ نامزد کئے گئے تمام افراد صدر زرعی ترقیاتی بینک کی تقرری کمیٹی میں شامل تھے، سارے معاملے میں زرعی ترقیاتی بینک کے ڈائریکٹر ایچ آر رانا مجاہد نے سہولت کاری کا کردار ادا کیا، تقرری میں بینک نیشنل ازم ایکٹ انیس سو چوہتر کی خلاف ورزی کی گئی۔

نیب ذرائع کا کہنا ہے کہ طلعت محمود پر منصب پر فائز ہونے کے بعد ڈھائی ہزار ملازمین کو غیر قانونی طور پر بھرتی کرنےکا بھی الزام ہے، اس سلسلے میں نیب راولپنڈی نے وزارت خزانہ سے تمام ریکارڈ حاصل کر لیا ہے، جس کے بعد کیس انکوائری سے انویسٹی گیشن کے مرحلے میں منتقل کیا گیا ہے۔

یہ بھی پڑھیں:  عدالت کا شہباز شریف کی اہلیہ اور بچوں کا ٹرائل علیحدہ کرنے کا حکم

ذرائع نیب کا مزید کہنا تھا کہ متعلقہ کیس میں سابق وزیر خزانہ اسحاق ڈار کو بھی دو بار طلب کیا جا چکاہے، تاہم وہ انکاری ہیں، اس کے علاوہ ڈائریکٹر رانا مجاہد بھرتی ریکارڈ دینے میں رکاوٹ بنتے رہے۔

Comments

یہ بھی پڑھیں