The news is by your side.

Advertisement

برصغیر کے مسلمان علامہ اقبال کی خدمات پر ہمیشہ انکے شکر گزار رہیں گے، عارف علوی

اسلام اباد : صدر مملکت ڈاکٹرعارف علوی نے کہا ہے کہ برصغیر کے مسلمان عظیم رہنما شاعر مشرق علامہ اقبالؒ کی انمول خدمات پر ہمیشہ ان کے شکر گزار رہیں گے، ہمیں ان کی تعلیمات پر عمل کرکے ملک و قوم کی ترقی کیلئے آگے بڑھنا چاہیے۔

یہ بات انہوں نے شاعرمشرق علامہ اقبالؒ کے یوم پیدائش کے موقع پر قوم کے نام اپنے پیغام میں کہی۔ صدر مملکت نے کہا کہ عظیم مفکر، فلسفی، شاعرعلامہ اقبالؒ کو یوم پیدائش پرخراج عقیدت پیش کرتا ہوں۔

آج کے دن ان کے خودی کے پیغام پر عمل پیرا ہونے کاعہد کرنے کا موقع ہے، برصغیر کے مسلمان عظیم رہنما کی انمول خدمات پر ہمیشہ ان کے شکر گزار رہیں گے۔

علامہ اقبالؒ نے برصغیر کے مسلمانوں میں ایک نئی روح پھونکی، آپ نے برصغیر کے مسلمانوں کیلئے ایک نئے وطن کا نظریہ دیا۔

علامہ اقبالؒ نے اسلام کے حقیقی پیغام کو سمجھنے کیلئے بھرپور خدمات انجام دیں، علامہ اقبالؒ کا شمار ان چند لوگوں میں ہوتا ہے جن کی عظمت کو مغرب اور مشرق معترف ہیں، علامہ اقبالؒ کے کام پر پوری دنیا کے لوگوں نے تحقیق کی اور اس کو سراہا۔

علامہ اقبالؒ کے پیغام کی پیروی کرتے ہوئے یکجا ہوکر درپیش مسائل کے حل کیلئے محنت کریں، ہمیں اقبالؒ کی تعلیمات کے مطابق مل کر ملک و قوم کی ترقی کیلئے آگے بڑھنا چاہیے۔

Comments

comments

یہ بھی پڑھیں