The news is by your side.

Advertisement

پاک بحریہ کو تمام وسائل مہیا کریں گے، صدر عارف علوی

کراچی: صدر مملکت ڈاکٹرعارف علوی نے کہا ہے کہ اللہ نے پاکستان کو بیش بہا بحری وسائل سے نوازا ہے جس کو فروغ دے کر ہم روزگار کے مواقع اور برآمدات میں اضافہ کرسکتے ہیں، حکومت پاک بحریہ کو تمام ضروری وسائل مہیا کرے گی۔

ان خیالات کا اظہار انہوں نے پاکستان نیوی ڈاکیارڈ میں منعقدہ ایک پروقار تقریب سے خطاب کرتے ہوئے کیا، اس موقع پر چیف آف دی نیول اسٹاف ایڈمرل ظفر محمود عباسی ودیگر بھی موجود تھے۔

عارف علوی نے کہا کہ پاک چائنا اقتصادی راہداری کے منصوبے سے پاکستان کی بحری حدود میں تجارت اور سرمایہ کاری میں نمایاں اضافہ ہوگا اور ان تمام تجارتی سرگرمیوں کے لیے ایک مستحکم بحریہ ناگزیر ہے۔

صدر مملکت نے کہا کہ حکومت پاک بحریہ کی دفاعی صلاحیتوں میں مزید اضافے اور بحری شعبے کے فروغ کے لیے تمام ضروری وسائل مہیا کرے گی، پاکستان اور ترقی کے درمیان دیرینہ اور گہرے تعلقات قائم ہیں اور پی این ایس معاون جیسے مشترکہ منصوبوں سے یہ تعلقات مزید مستحکم ہوں گے۔

چیف آف دی نیول اسٹاف ایڈمرل ظفر محمود عباسی نے کہا کہ پاک بحریہ بحری جنگی جہازوں کی تعمیر کے میدان میں خود انحصاری کے حصول کے لیے کوشاں ہے۔

پاک بحریہ میں فلیٹ ٹینکر پی این ایس معاون شامل

پاک بحریہ میں 1700 ٹن فلیٹ ٹینکر پی این ایس معاون پاکستان نیوی ڈاکیارڈ میں منعقدہ ایک پروقار تقریب کے دوران پاکستان نیوی فلیٹ میں شامل کردیا گیا، پی این ایس معاون کراچی شپ یارڈ اینڈ انجیئنرنگ ورکس میں تعمیر ہونے والا سب سے بڑا بحری جہاز ہے جسے ترکی کے اشتراک سے تیار کیا گیا ہے۔

یہ جہاز کئی مختلف قسم کے میری ٹائم آپریشنز انجام دینے کی صلاحیت کا حامل ہے جن میں سمندر میں موجود پاک بحریہ کے دیگر جہازوں کو تیل اور دیگر فوجی سازو سامان کی فراہمی شامل ہے۔

جہاز پر دو ہیلی کاپٹرز کی گنجائش موجود ہے، پی این ایس معاون پر جدید ترین طبی سہولیات بھی موجود ہیں جس کی بدولت یہ جہاز کسی بھی قسم کی قدرتی آفات کے دوران سمندر میں محو سفر دوست ممالک کے بحری جہازوں کو فوری امداد بھی فراہم کرسکتا ہے۔

Comments

comments

یہ بھی پڑھیں