اسلام آباد: صدر مملکت ڈاکٹر عارف علوی کا کہنا ہے کہ وزیر تعلیم شفقت محمود نے کرونا وائرس کی وبا کے دوران بہترین حکمت عملی اپنائی، طلبا معاشرے کی مثبت سوچ کو پروان چڑھانے میں معاون ثابت ہو سکتے ہیں۔
تفصیلات کے مطابق صدر مملکت ڈاکٹر عارف علوی نے تقریب سے خطاب کرتے ہوئے کہا کہ یکساں نصاب تعلیم معاشرے میں توازن قائم کرنے کے لیے اہم ہے، ٹیکنالوجی کے استعمال سے ہی ملک تیزی سے ترقی کر سکے گا۔
صدر مملکت کا کہنا تھا کہ جسمانی صحت کے ساتھ ذہنی صحت بھی ضروری ہے، تعلیم اور صحت کے شعبے میں توجہ دینے سے معاشرے مضبوط ہوتے ہیں۔
انہوں نے مزید کہا کہ وزیر تعلیم شفقت محمود نے کرونا وائرس کی وبا کے دوران بہترین حکمت عملی اپنائی، طلبا معاشرے کی مثبت سوچ کو پروان چڑھانے میں معاون ثابت ہو سکتے ہیں۔
اس سے قبل ایک موقع پر صدر مملکت کا کہنا تھا کہ ہمیں لسانیت سے ہٹ کر غریبوں کی فکر کرنی چاہیئے اور اس کی بہترین مثال ہم نے کرونا وائرس وبا کے دوران دیکھی۔
انہوں نے کہا تھا کہ حکومت نے کرونا وائرس کی وبا کا ڈٹ کر مقابلہ کیا، کرونا وبا کے دوران پاکستان پر اللہ کا خصوصی کرم رہا۔
