لاہور: صدر مملکت ڈاکٹر عارف علوی نے کہا ہے کہ میں حادثاتی طور پر دانتوں کا ڈاکٹر بن گیا ہوں۔
تفصیلات کے مطابق صدر مملکت ڈاکٹر عارف علوی نے بین الاقوامی ڈینٹسری کانفرنس سے خطاب کرتے ہوئے کہا کہ لوگ دانتوں کے مرض سے آگاہی چاہتے ہیں، ہم بیماریوں کا انتظار کرتے ہیں، تدارک کے لیے کچھ نہیں کرتے ہیں۔
صدر مملکت نے کہا کہ 90 فیصد دانتوں کی بیماریوں سے پرہیز کرکے بچا جاسکتا ہے، میرے تحقیقی مکالے بھارت میں شائع ہوگئے، پاکستان میں شائع نہیں ہوسکے ہیں۔
ڈاکٹر عارف علوی نے کہا کہ ڈینٹل ڈاکٹر کو کم از کم 6 ماہ سرکاری اسپتال میں گزارنا لازمی قرار دینا ہوگا، ملک میں لوگوں کو مسائل اور بیماریوں سے آگاہی چاہئے۔
انہوں نے کہا کہ اس ملک کا فکر مند نوجوان نہیں ہوگا تو کون ہوگا، خوشی کا تعلق خدمت کے جذبے سے ہے۔
مزید پڑھیں: صدر عارف علوی سے وزیر اعلیٰ پنجاب عثمان بزدار کی ملاقات
صدر عارف علوی نے کہا کہ کوشش کرتا ہوں پروٹوکول کی زحمت کم ہو، عوام کی خدمت کے لیے جو میں کرسکتا ہوں وہ کروں گا۔
انہوں نے کہا کہ وزیراعظم نے گلوبل وارمنگ، صحت اور دیگر مسائل پر بات کی ہے جبکہ پاکستان میں لوگ خدمت خلق کے معاملے پر کبھی پیچھے نہیں رہے ہیں۔
یاد رہے کہ صدر مملکت ڈاکٹر عارف علوی کا شمار ایشیا کے ممتاز ڈینٹسٹ میں ہوتا ہے۔
واضح رہے کہ آج صدر مملکت ڈاکٹر عارف علوی سے وزیراعلٰی پنجاب عثمان بزدار کی ملاقات ہوئی تھی جس میں صوبے کے مختلف امور پر تبادلہ خیال کیا گیا تھا۔
وزیر اعلیٰ پنجاب نے صدر مملکت کو سانحہ چونیاں کے ملزم کی گرفتاری اور سانحہ چونیاں جیسے واقعات کے تدارک کی حکومتی کوششوں سے آگاہ کیا تھا۔
