The news is by your side.

Advertisement

صدر مملکت نے قومی اسمبلی کا اہم اجلاس طلب کرلیا

اسلام آباد: مسلم لیگ ن کے لیے پارٹی صدارت اہم مسئلہ بن گئی۔ نا اہل پارٹی صدر کو اہل کرنے کے لیے کوششیں تیز کردی گئیں۔ صدر مملکت ممنون حسین نے آج قومی اسمبلی کا اہم اجلاس طلب کرلیا۔

تفصیلات کے مطابق صدر مملکت ممنون حسین نے قومی اسمبلی کا اہم اجلاس آج شام 5 بجے پارلیمنٹ ہاؤس اسلام آباد میں طلب کرلیا۔

اجلاس میں سینیٹ ترامیم کے ساتھ منظور شدہ الیکشن اصلاحات بل 2017 منظوری کے لیے پیش ہوگا۔

مزید پڑھیں: نواز شریف کی دوبارہ پارٹی صدر بننے کی راہ ہموار

ذرائع کے مطابق قومی اسمبلی نئے قانون کی منظوری دے گی جس کے تحت وزارت عظمیٰ کے ساتھ ساتھ پارٹی صدارت سے نااہل ہونے والے نواز شریف کو پارٹی صدارت کے لیے اہل قرار دیا جائے گا۔

قومی اسمبلی کے آج کے اجلاس میں معلومات تک رسائی کا بل 2017 کی منظوری بھی ایجنڈے کا حصہ ہوگی۔

یاد رہے کہ حکومت نے 22 ستمبر کو الیکشنز ایکٹ میں ترمیم کا بل پیش کیا تھا۔ بل کی منظوری پر بیشتر اراکین سینیٹ جمعہ کی نماز میں مصروف تھے۔ اپوزیشن کی مخالفت کے باوجود بل ایک ووٹ کی برتری سے منظور کروا لیا گیا۔

مزید پڑھیں: انتخابی اصلاحات بل 2017 عدالت میں چیلنج

انتخابی اصلاحاتی بل میں کسی بھی نا اہل شخص کے سیاسی جماعت کے بھی عہدیدار نہ بننے کے حوالے سے کوئی شق موجود نہیں تھی اسی لیے پیپلز پارٹی کے اعتزاز احسن نے یہ ترمیم پیش کی۔ بل کی شق 203 میں کہا گیا ہے کہ ہر پاکستانی شہری کسی بھی سیاسی جماعت کی رکنیت اور عہدہ حاصل کرسکتا ہے۔

بل کی اہم ترین شق 203 کو 38 اراکین نے حق میں جبکہ 37 نے مخالفت میں ووٹ دیا تھا نتیجتاً یہ ترمیم منظور کرلی گئی، جس کے بعد سابق وزیر اعظم نواز شریف کے دوبارہ پارٹی صدر بننے کی راہ ہموار ہو گئی۔


 

Print Friendly, PDF & Email

Comments

comments

یہ بھی پڑھیں