اسلام آباد : ترک صدررجب طیب اردگان14 فروری کو پارلیمنٹ کے مشترکہ اجلاس سے خطاب کریں گے، رجب طیب اردگان کل شام پاکستان پہنچیں گے، دورے میں متعدد معاہدوں اور تعاون کی یادداشتوں پر دستخط ہوں گے۔
تفصیلات کے مطابق صدر مملکت عارف علوی نے پارلیمنٹ کامشترکہ اجلاس 14فروری کو طلب کر لیا، پارلیمنٹ کامشترکہ اجلاس صبح 11بجےطلب کیا گیا ، ترک صدر رجب طیب اردگان مشترکہ اجلاس سے خطاب کریں گے۔
یاد رہے ترک صدر رجب طیب اردگان کل شام ساڑھے 4 بجے اسلام آباد پہنچیں گے، ترک صدر کا نور خان ایئر بیس پر ریڈ کارپٹ استقبال کیا جائے گا جبکہ انہیں گارڈ آف آنر بھی دیا جائے گا۔
ذرائع کے مطابق وزیر اعظم عمران خان ترک صدر کا خود استقبال کریں گے، جس کے بعد وہ ایوان صدر جائیں گے، جہاں ان کے اعزاز میں عشائیہ دیا جائے گا۔
مزید پڑھیں : ترک صدر طیب اردگان کل پاکستان پہنچیں گے
ذرائع کا کہنا ہے کہ دورے میں رجب طیب اردگان صدر مملکت ڈاکٹر عارف علوی اور وزیر اعظم عمران خان سے الگ الگ ملاقات کریں گے، متعدد معاہدوں اور تعاون کی یادداشتوں پر دستخط ہوں گے۔
ذرائع کے مطابق ترک صدر کے دورے کے دوران پاک، ترک اعلیٰ سطح تذویراتی تعاون کونسل کا اجلاس بھی منعقد ہو گا اور وزیر اعظم عمران خان اور ترک صدر اجلاس کی مشترکہ صدارت کریں گے۔
ترک صدر کے دورے کے دوران تذویراتی اقتصادی فریم ورک اور باہمی تعاون کے تحت معاہدات کا امکان ہے جبکہ سرمایہ کاری، تجارت، دفاعی پیداوار، بینکنگ، مالیات میں تعاون بڑھایا جائے گا۔
