The news is by your side.

Advertisement

صفدر اور مریم ٹھیک ہیں، نواز شریف کیسے بیمار ہوگئے، آئی جی جیل خانہ جات

صدر ممنون حسین نے نواز شریف کے مکمل علاج کو یقینی بنانے کی ہدایت کر دی

لاہور: آئی جی جیل خانہ جات مرزا شاہد سلیم نے کہا ہے کہ صفدر اور مریم ٹھیک ہیں تو پھر نواز شریف کیسے بیمار ہوگئے۔

تفصیلات کے مطابق آئی جی جیل خانہ جات نے سابق وزیر اعظم نواز شریف کے بیمار پڑنے پر تبصرہ کرتے ہوئے کہا ہے کہ جیل میں تو سب ہی بیمار ہو جاتے ہیں تاہم صفدر اور مریم ٹھیک ہیں، صرف نواز شریف بیمار ہوگئے۔

مرزا شاہد سلیم کا کہنا تھا کہ گھر سے جیل کھانا 3 گھنٹے میں پہنچے گا تو وہ خراب ہی ہوگا، انھوں نے مزید کہا کہ میڈیکل بورڈ رپورٹ کے بعد دودھ کا دودھ اور پانی کا پانی ہوجائے گا۔

دوسری طرف صدرِ پاکستان ممنون حسین نے نواز شریف کی صحت سے متعلق خبروں پر تشویش کا اظہار کیا ہے، انھوں نے اس سلسلے میں نگراں وزیر اعظم جسٹس (ر) ناصر الملک کو ٹیلی فون بھی کیا۔

صدر ممنون حسین نے نواز شریف کے مکمل علاج کو یقینی بنانے کی ہدایت جاری کر دی، انھوں نے کہا ’نواز شریف کو علاج  معالجے کی تمام سہولتیں فراہم کی جائیں۔‘

نوازشریف جیل جاتے ہی بیمار، طبی معائنے کے لئے میڈیکل ٹیم اڈیالہ پہنچ گئی

واضح رہے کہ محلات میں رہنے کے عادی اور شاہانہ زندگی گزارنے والے سابق وزیر اعظم نواز شریف کو اڈیالہ جیل میں آج دسواں دن ہے، جیل کے ماحول نے ان کی نازک طبع پر برے اثرات مرتب کر دیے ہیں۔

ایون فیلڈ ریفرنس میں سزا یافتہ نواز شریف کے طبی معائنے کے لیے پمز اسپتال کے چار سینئر ڈاکٹرز پر مشتمل میڈیکل ٹیم اڈیالہ جیل پہنچ چکی ہے، جب کہ طبی معائنے کے لیے نواز شریف کو سیل سے جیل اسپتال منتقل کردیا گیا ہے۔


خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

Comments

comments

یہ بھی پڑھیں