تہران : ایرانی صدر حسن روحانی کے بھائی حُسین فریدون روحانی کو کرپشن کے الزام میں جیل بھیج دیا گیا۔
غیر ملکی میڈیا کے مطابق ایرانی صدر حسن روحانی کے بھائی حُسین فریدون روحانی کو کرپشن کے الزام میں گرفتار کیا گیا تھا ، حسین فریدون غیرمعینہ مالی معاملات کے حوالے سے ضمانت کی شرائط کو پورا نہیں کر سکے، جس کے بعد انھیں جیل بھیج دیا گیا۔
عدلیہ کے ترجمان غلام حسین محسنی کا کہنا ہے کہ حسین فریدون پر کرپشن کے کئی کیس قائم ہیں، اس حوالے سے کئی لوگوں سے تحقیقات کی جارہی ہیں۔
انہوں نے کہا کہ ضمانت کی شرائط کو پورا نہ کرنے کی وجہ سے حسین فریدون کو گرفتار کرکے جیل بھیج دیا گیا ہے البتہ اگر وہ عدالت سے ضمانت حاصل کرلیتے ہیں تو انہیں رہا کیا جاسکتا ہے تاہم ان کے خلاف مقدمہ جاری رہے گا۔
اس سے قبل ایرانی صدر کے بھائی حُسین فریدون روحانی کا نام سرکاری انشورنس کمپنی میں مینجیرز کی زیادہ تنخواہوں کے اسکینڈل میں ملوث حکام کے ساتھ بھی سامنے آیا تھا لیکن وہ کسی قسم کی بدعنوانی کی تردید کرتے آئے ہیں۔
خیال رہے کہ ایک سال قبل جنرل انسپکشن آرگنائزیشن کے سربراہ ناصر سراج نے حسین فریدون پر مالی بے ضابطگیوں کا الزام عائد کیا تھا، جس کے بعد ان کے خلاف تحقیقات کا آغاز کیا گیا تھا۔
