لندن: برطانوی شاہی خاندان کے چھوٹے نواب پرنس ہیری اور میگھن مارکل نے اپنے بیٹے کا نام رکھ دیا۔
برطانوی خبررساں ادارے کی رپورٹ کے مطابق میگھن اور ہیری نے اپنے بیٹے کو میڈیا کے سامنے پیش کرتے ہوئے بتایا کہ انہوں نے اُس کا نام ’آرچی‘ رکھا، نام رکھنے کا معاملہ شاہی خاندان اور ملکہ برطانیہ کی مشاورت سے طے پایا۔
میگھن مارکل کی طبیعت بہتر ہونے کے بعد انہیں اسپتال سے شاہی محل منتقل کردیا گیا۔ شہزادے ہیری کا کہنا تھا کہ وہ اور خاندان کے دیگر افراد بہت خوش ہیں کیونکہ ماں اور بیٹے دونوں صحت مند ہیں۔
انہوں نے بتایا کہ بیٹے کا پیدائش کے وقت وزن 7 پاؤنڈ تھا، میرے لیے والد بننے کا لمحہ اس قدر خوشگوار تھا کہ اسے الفاظ میں بیان نہیں کرسکتا، تمام معاملات خوش اسلوبی سے طے ہوئے اور اب میگھن بھی گھر جارہی ہیں۔
مزید پڑھیں: شہزادہ ہیری اورمیگھن مرکل اپنے نومولود بیٹے کو لے کر سامنے آگئے
شہزادہ ہیری کے نومولود بیٹے تخت شاہی کے ساتویں امیدوار ہیں تاہم ابھی یہ واضح نہیں کہ نومولود کو شاہی اعزاز سے نوازا جائے گا یا شاہی حیثیت سے محروم کردیا جائے گا کیونکہ کہ شاہی خاندان کے تین ارکان کو پسند کی شادی کی وجہ سے شاہی حیثیت ترک کرنا پڑی تھی۔
واضح رہے کہ 34 سالہ شہزادہ ہیری کی شادی 37 سالہ سابق امریکی اداکارہ میگھن مرکل سے گزشتہ سال مئی انجام پائی تھی، جسے لاکھوں کی تعداد میں مداحوں نے دیکھا تھا۔
خیال رہے کہ چند روز قبل ڈیلی میل نا می برطانوی ادارے میں شائع ہونے والی ایک رپورٹ کے مطابق برطانوی شہزادہ ہیری اور میگھن مرکل کے یہاں آنے والے نئے مہمان کا اٹالین نام ’الیگرا‘ رکھا جائے گا کیونکہ آنجہانی لیڈی ڈیانا کو یہ اٹالین نام بہت پسند تھا۔
