لندن: گزشتہ 130 سال میں پہلی بار کسی برطانوی شاہی خاندان کے فرد کی عدالت میں پیشی ہوئی ہے، شہزادہ ہیری نے ہائی کورٹ میں پیش ہو کر جرح کا سامنا کیا۔
برطانوی اخبارات کے مطابق 1890 کے بعد پہلی بار برطانوی شاہی خاندان کے کسی فرد کی عدالت میں پیشی ہوئی ہے، شہزادہ ہیری گواہ کے طور پر لندن ہائیکورٹ میں پیش ہوئے۔
روئٹرز کے مطابق شہزادہ ہیری نے منگل کو لندن کی ہائی کورٹ میں برطانوی ٹیبلوئڈ ڈیلی مرر کے پبلشر کے خلاف اپنے مقدمے میں ثبوت پیش کیے، جس پر انھوں نے فون ہیکنگ اور دیگر غیر قانونی کاموں کا الزام لگایا تھا۔
انھوں نے عدالت کو بتایا کہ جب وہ نو عمر تھے اور ایٹن اسکول میں زیر تعلیم تھے تو اخبار نے ان کی وائس میل ہیک کی، اور اس طرح بھائیوں کے درمیان اتحاد کی فضا کو خراب کیا، انھوں نے کہا روزنامہ مِرر نے ان کی تربیت پر تخریبی اثرات مرتب کیے۔
شہزادہ ہیری آج دوبارہ عدالت میں پیش ہوں گے، واضح رہے کہ شہزادہ ہیری نے مرر گروپ نیوز پیپرز پر مقدمہ کیا ہوا ہے، جس میں الزام لگایا گیا ہے کہ پبلشر کے صحافیوں نے ان کا فون ہیک کیا اور 1996 اور 2009 کے درمیان ان کی زندگی کے بارے میں معلومات اکٹھا کرنے کے لیے دیگر غیر قانونی ذرائع استعمال کیے۔
بی بی سی کے مطابق ایک تحریری گواہی کے بیان میں پرنس ہیری نے سابق مرر ایڈیٹر پیئرز مورگن پر ’’خوفناک ذاتی حملوں‘‘ کا الزام لگایا۔ ان کا کہنا تھا کہ مبینہ حملے ’’ممکنہ طور پر انتقامی کارروائی اور اس امید میں کیے گئے تھے کہ میں پیچھے ہٹ جاؤں گا۔‘‘ تاہم مرر کے وکیل کا کہنا تھا کہ بہت سی کہانیوں کے پیچھے جائز ذرائع کارفرما تھے اور کئی پہلے سے ہی پبلک ڈومین میں تھے۔
