سان فرانسسکو: شاہی خاندان ترک کرنے والے شہزادہ ہیری نے ایک امریکی کمپنی میں ملازمت حاصل کر لی ہے۔
تفصیلات کے مطابق شہزادہ ہیری نے امریکی کمپنی ’بیٹر اپ‘ میں چیف امپیکٹ آفیسر کے عہدے پر نوکری حاصل کی ہے، ان کی تنخواہ کے بارے میں بھی خبریں میڈیا کی زینت بن گئی ہیں۔
برطانوی میڈیا کا کہنا ہے کہ 36 سالہ شہزادہ ہیری کی تنخواہ 7 ہندسوں پر مشتمل ہوگی، جس کا مطلب ہے کہ ممکنہ طور پر ہیری کی تنخواہ 10 لاکھ ڈالر سے زیادہ ہوگی۔
ڈیوک آف سسیکس کو سان فرانسسکو کی ایک ہیلتھ ٹیک کمپنی نے ملازمت دی ہے جو پیشہ ورانہ اور دماغی صحت سے متعلق خدمات فراہم کرتی ہے۔
ہیری اور میگھن متنازعہ انٹرویو: شاہی خاندان کی مقبولیت کا گراف تبدیل
پرنس ہیری نے کمپنی کے سی ای او کے ساتھ مشترکہ پیغام میں کہا کہ میں کمپنی کے لیے اپنا کردار ادا کرنے کے لیے پُر جوش ہوں۔
انھوں نے کہا میں اس بات پر یقین رکھتا ہوں کہ ذہنی فٹنس کو ترجیح دینے اور اس پر توجہ مرکوز کرنے سے ہمیں ان صلاحیتوں کا پتا چلتا ہے جن کے بارے میں پہلے ہم نہیں جانتے تھے۔
دوسری طرف بیٹر اپ (BetterUp) کمپنی نے ہیری کو ایک دفاعی تجربہ کار، انسان دوست اور ماحول شناس کے طور پر متعارف کروایا، اور سی ای او نے انھیں خوش آمدید کہا۔
واضح رہے کہ گزشتہ برس جنوری میں شاہی خاندان کے سینیئر ارکان کی حیثیت سے دست بردار ہونے والی جوڑی شہزادہ ہیری اور میگھن مارکل نے رواں ماہ 9 مارچ کو شاہی خاندان سے باضابطہ طور پر علیحدگی کا اعلان کیا تھا۔
