اسلام آباد : اسماعیلی برادری کے روحانی پیشوا پرنس رحیم آغا خان کی پاکستان آمد پر صدرِ مملکت آصف علی زرداری کی جانب سے معزز مہمان کے اعزاز میں عشائیہ دیا گیا۔
تفصیلات کے مطابق اسماعیلی برادری کے روحانی پیشوا پرنس رحیم آغا خان اپنے پہلے سرکاری دورے پر پاکستان پہنچ گئے۔
ایئرپورٹ سے معزز مہمان ایوانِ صدر پہنچے، جہاں صدر آصف علی زرداری سے اسماعیلی برادری کے روحانی پیشوا پرنس رحیم آغا خان نے خصوصی ملاقات کی۔
اس اہم ملاقات میں خاتونِ اول آصفہ بھٹو زرداری اور پاکستان پیپلز پارٹی کے چیئرمین بلاول بھٹو زرداری بھی شریک ہوئے، بعد ازاں دونوں رہنماؤں کے درمیان وفود کی سطح پر بھی تفصیلی بات چیت ہوئی۔
ملاقات کے دوران صدر آصف علی زرداری نے پاکستان میں صحت، تعلیم، کمیونٹی ڈویلپمنٹ، ماحولیاتی لچک اور ثقافتی ورثے کے تحفظ کے شعبوں میں آغا خان ڈویلپمنٹ نیٹ ورک کے دیرینہ اور بے مثال تعاون کی دل کھول کر تعریف کی۔
صدرِ مملکت نے ملک کے پسماندہ اور کمزور طبقات کی فلاح و بہبود کے لیے آغا خان نیٹ ورک کے ساتھ باہمی تعاون کو مزید مضبوط اور وسیع کرنے کے عزم کا اعادہ کیا۔
انہوں نے آغا خان برادری کی پاکستان کے ساتھ دیرپا وابستگی اور ملکی ترقی کے لیے سرانجام دی جانے والی تاریخی خدمات کو گرانقدر الفاظ میں سراہا۔
پرنس رحیم آغا خان نے پاکستان میں کیے جانے والے پُرتپاک خیرمقدم اور مہمان نوازی پر صدر آصف علی زرداری کا شکریہ ادا کیا۔
صدرِ مملکت آصف علی زرداری کی جانب سے پرنس رحیم آغا خان کے اعزاز میں ایوانِ صدر میں ایک پروقار اور بڑے عشائیے کا اہتمام کیا گیا، جس میں ملک کی اعلیٰ سیاسی، عسکری اور انتظامی قیادت نے شرکت کی۔
عشائیے میں وزیراعظم شہباز شریف ، چیف آف ڈیفنس فورسز و فیلڈ مارشل جنرل سید عاصم منیر ، چیئرمین سینیٹ سید یوسف رضا گیلانی ، اسپیکر قومی اسمبلی سردار ایاز صادق ، وزیراعلیٰ سندھ سید مراد علی شاہ سمیت وفاقی وزراء، ارکانِ پارلیمنٹ اور اسماعیلی کمیونٹی کے ممتاز ارکان بھی شریک ہوئے۔
ذرائع کے مطابق پرنس رحیم آغا خان اپنے اس ہفتہ بھر کے دورے کے دوران وفاقی دارالحکومت میں اہم ملاقاتوں کے بعد گلگت بلتستان اور چترال کا بھی دورہ کریں گے، جہاں وہ اسماعیلی برادری کے مذہبی و روحانی اجتماعات (دیدار) میں شرکت کریں گے اور آغا خان نیٹ ورک کے ترقیاتی منصوبوں کا جائزہ لیں گے۔
اے آر وائی نیوز کی ڈیجیٹل ڈیسک کی جانب سے شائع کی گئی خبریں