لندن: لیڈی ڈیانا کا عروسی جوڑا پہلی بار عوامی نمائش کے لیے پیش کر دیا گیا۔
تفصیلات کے مطابق پرنسز آف ویلز لیڈی ڈیانا کا عروسی لباس 25 برسوں میں پہلی بار کینسٹن پیلس میں گزشتہ روز نمائش کے لیے پیش کر دیا گیا ہے۔
شادی کے دن پہنا ہوا جوڑا نہ صرف خود کہانیوں کی پریوں کے لباس سے کم حسین نہ تھا بلکہ آج بھی کروڑوں دلوں پر راج کرنے والی شہزادی ڈیانا پر بے حد جچتا تھا۔
شادی کا یہ جوڑا لیڈی ڈیانا نے چالیس برس پہلے پہنا تھا، اور اسے اب ان کے پرانے کینسٹن پیلس والے گھر میں نمائش کے لیے رکھا گیا ہے، اسے ڈیانا کے بیٹوں دی ڈیوک آف کیمبرج، پرنس ولیم اور دی ڈیوک آف سسیکس، پرنس ہیری نے نمائش کے لیے ادھار پر دیا ہے۔
VIDEO: Princess Diana's wedding dress for her 1981 marriage to Prince Charles was one of the best-kept secrets in fashion history. The gown sparked such intense interest that it was kept in a safe at night. It has now been loaned by her sons for a royal exhibition in London pic.twitter.com/ycOiZjOBhJ
— AFP News Agency (@AFP) June 4, 2021
یہ جوڑا اگلے ماہ پہلی جولائی کو لیڈی ڈیانا کی 60 ویں سالگرہ کی آمد کے حوالے سے نمائش کے لیے پیش کیا گیا ہے، نمائش کے آرگنائزرز رائل اسٹائل کا کہنا ہے کہ یہ جوڑا اب عروسی تاریخ کے مشہور ترین جوڑوں میں سے ایک ہے۔
یہ لباس ڈیزائنر ڈیوڈ اور الزبتھ ایمانوئل کا تیار کردہ ہے، ڈیانا نے اسے 1981 میں شادی کی تقریب میں پہنا تھا، یہ گاؤن 25 فٹ (7.6m) طویل تھا اور اس کے استر پر زیبائش کے ہزاروں ستارے جڑے ہوئے تھے، یہ اتنا طویل تھا کہ اس نے سینٹ پال کیتھیڈرل چرچ کی راہداری کو بھر دیا تھا۔
یاد رہے کہ لیڈی ڈیانا اور پرنس چارلس کی شادی 1981 میں ہوئی اور 1996 میں دونوں نے باہمی رضا مندی سے علیحدگی اختیار کر لی، جب کہ اگلے برس 1997 میں سڑک کے ایک بھیانک حادثے میں لیڈی ڈیانا اس دارِ فانی سے کوچ کر گئیں۔
