لاہور (13 مئی 2026): وزیراعلیٰ پنجاب مریم نواز نے صوبے بھر میں تمام نجی ہاؤسنگ سوسائٹیز سے متعلق اہم فیصلہ کر لیا ہے۔
اے آر وائی نیوز کے مطابق وزیراعلیٰ پنجاب مریم نواز کی زیر صدارت کمشنرز کا اجلاس ہوا جس میں مختلف اضلاع میں مجوزہ ترقیاتی منصوبوں پر بریفنگ دی۔
وزیراعلیٰ پنجاب نے فیصل آباد میں تین سالہ بچی کے کھلے گٹر میں گر کر جاں بحق ہونے پر برہمی کا اظہار کرتے ہوئے کہا کہ اب اگر کوئی شہری مین ہول میں گرا تو سوسائٹی مالکان کو گرفتار کیا جائے گا۔
مریم نواز نے کمشنرز کو تمام نجی ہاؤسنگ سوسائٹیز سے کھلے مین ہولز نہ ہونے سے متعلق ہر ماہ بیان حلفی لینے کی ہدایت کرتے ہوئے اس حوالے سے پنجاب بھر کی تمام نجی سوسائٹیز کو نوٹس جاری کرنے کا حکم جاری کیا۔
انہوں نے ڈسٹرکٹ ڈیولپمنٹ پلان کے تحت مقامی ریونیو سے عوامی فلاح کے منصوبوں کی منظوری دیتے ہوئے کہا کہ کمشنرز حکومت کی آنکھیں، کان اور بازو ہوتے ہیں۔ اپنی ذمہ داریاں پوری کریں اور ایئر کنڈیشنڈ کمروں میں بیٹھنے کے بجائے فیلڈ میں نظر آئیں۔
اس موقع پر ضلع انتظامی افسران نے انہیں اپنے اپنے اضلاع میں ہونے والے اور منظور شدہ ترقیاتی منصوبوں سے آگاہ کیا۔
اے آر وائی نیوز کی ڈیجیٹل ڈیسک کی جانب سے شائع کی گئی خبریں