لاہور: محکمہ اسکول ایجوکیشن نے تمام نجی اسکولوں پر پابندی عائد کی ہے کہ والدین کو کسی مخصوص دکان سے کتابیں اور یونیفارم خریدنے پر مجبور نہیں کیا جا سکتا۔
تفصیلات کے مطابق محکمہ اسکول ایجوکیشن پنجاب نے تمام نجی اسکولوں کو والدین پر کتابیں، یونیفارم اور دیگر اسکول آئٹمز کسی خاص دکان سے خریدنے کے لیے پابند نہ کرنے کی ہدایت جاری کر دی ہے۔
اس حوالے سے باقاعدہ مراسلہ بھی جاری کر دیا گیا ہے، جس میں کہا کوئی بھی نجی اسکول والدین کو مخصوص دکان یا وینڈر سے کتابیں، یونیفارم، جوتے، کاپیاں یا دیگر تعلیمی سامان خریدنے پر مجبور نہیں کر سکتا۔
محکمہ اسکول ایجوکیشن کا کہنا ہے کہ والدین کو کسی بھی قسم کی خریداری کے لیے پابند کرنا نجی اسکولوں کے قوانین کے خلاف ہے۔
محکمہ اسکول ایجوکیشن نے واضح کیا ہے کہ اگر کوئی نجی اسکول والدین پر دباؤ ڈالے یا کسی مخصوص دکان سے سامان خریدنے کی شرط عائد کرے تو والدین اس کی شکایت اپنے ضلع کی متعلقہ ایجوکیشن اتھارٹی میں درج کرا سکتے ہیں۔
محکمہ اسکول ایجوکیشن کے مطابق خلاف ورزی کرنے والے نجی اسکولوں کے خلاف قانون کے مطابق کارروائی عمل میں لائی جائے گی۔
اے آر وائی نیوز کی ڈیجیٹل ڈیسک کی جانب سے شائع کی گئی خبریں